Moskva er dýrust borga

Moskva er dýrasta borg heims samkvæmt nýrri könnun ráðgjafafyrirtækisins Mercer Human Resource. Seoul, höfuðborg Suður-Kóreu, varð í öðru sæti, Tókýó í því þriðja og Hong Kong í fjórða. Lundúnir eru fimmta dýrasta borg heims.

Meginástæða þess að Moskva stökk úr fjórða sætinu í toppsætið milli ára er hækkun fasteignaverðs í borginni segir í skýrslu Mercer. Þá hefur mikil verðbólga í Rússlandi áhrif.

Skýrsla Mercer nær yfir hundrað fjörutíu og fjórar borgir í sex heimsálfum og metur kostnað við meira en tvö hundruð þætti. Könnunin tekur ekki til Reykjavíkur.

Asuncion, höfuðborg Paragvæ, er ódýrasta borg heims, rúmlega þrefalt ódýrari en Moskva. Austur-þýska borgin Leipzig er ódýrasta borg Evrópu.

Kaupmannahöfn er í áttunda sæti listans og Ósló í því tíunda, ásamt New York.