Ekið frá Selfossi til Alþingis með undirskriftir í dag

Sunnlendingar og fleiri hyggjast fjölmenna í bílalest þar sem ekið verður frá Tryggvaskála á Selfossi og niður að Alþingishúsi í miðbæ Reykjavíkur. Þar ætla þeir að afhenda Alþingi undirskriftir 25 þúsund Íslendinga sem skora á þingið að lögfesta tvöföldun Suðurlandsvegar án tafar.

Hópi manna á Suðurlandi þykir þetta ekki nóg hafa undanfarnar þrjár vikur staðið fyrir undirskriftasöfnun þar sem farið er fram á að Alþingi samþykki tafarlaust að tvöfalda veginn. Eyþór Arnalds, einn þeirra sem staðið hafa að undirskriftasöfnuninni, segir að lagt verði af stað frá Tryggvaskála klukkan 16 og komið að Alþingishúsinu um klukkan fimm þar sem undirskriftirnar verða afhentar. Eyþór segir að áskorunin sé vel meint og stuðningsyfirlýsing við þá sem geri vel.

Efasemdir hafa komið fram um það að tvöfalda þurfi veginn og bent á lítill munur sé á slysatíðni á þriggja akreina vegum og fjögurra akreina. Eyþór segir um það að Sunnlendingar og flestir í landinu séu sammála um að aðeins það besta sé nógu gott. Reykjanesbrautin hafi sannað gildi sitt og sambærilegur vegur eigi að liggja um Suðurland. Þetta sé ákvörðun sem varði ekki daginn í dag heldur næstu áratugi.