Skítkast í Hafnarfirði

Verum ábyrg, sýnum virðingu og verum reglusöm eru einkunnarorð Víðistaðaskóla. Nokkrir ungir drengir úr skólanum hafa stofnað hóp sem þeir kalla Andarungarnir. Drengirnir halda úti heimasíðu þar sem má sjá myndskeið í anda Jack ass þáttanna og Strákanna. Í nýjasta myndbandinu kasta drengirnir hundaskít í skólabyggingu.

Á heimasíðu drengjanna andarungar.tk má finna slúður um bekkjarfélagana, áskoranir þar sem drengirnir fækka fötum í matsalnum og myndir af skemmtunum innan skólans. Sigurður Björgvinsson, skólastjóri, vissi ekki af síðunni þegar NFS hafði samband við hann en sagðist ætla að skoða hana hið fyrsta.

Vaktstjóri hjá Lögreglunni í Hafnarfirði sagði að ekki væri leyfilegt að kasta mannaskít í hús; borist hefði ábending um málið og það væri í rannsókn.