Hvetur göngufólk að búa sig vel

Páll Ásgeir Ásgeirsson, blaðamaður og höfundur leiðsögubóka um hálendið, ráðleggur göngufólki að hætta sér ekki í íshellana við Hrafntinnusker þar sem erlendur ferðamaður lést í morgun. Hann segir að fólk verði að vera við öllu búið í ferðum um hálendi Íslands.

Lögregla telur að fimm til sex tonn af ís hafi hrunið úr lofti íshellisins við Hraftinnusker á 38 ára þýskan ferðamann. Hrafntinnusker er viðkomustaður á Laugaveginum, einni vinsælustu gönguleið Íslands sem Páll Ásgeir Ásgeirson blaðamaður hefur skrifað bók um.

"Leiðin frá Landmannalaugum til Þórsmerkur er ein fjölfarnasta gönguleið á Íslandi. Á þessum áfangi leiðarinnar, frá Landmannalaugum til Álftavatns er jarðhitasvæði þar sem ís og hiti mætast. Þetta slys er áminning til allra ferðamanna. Það er hættulegt að ferðast í íslenskri náttúru og menn ferðafólk verður að búa sig vel."

Minni snjór er nú á svæðinu við Hrafntinnusker en hefur verið síðustu ár. Hlýindi og rigningar hafa sett svip sinn á sumarið. Líklegt er talið að maðurinn sem varð undir hruninu hafi látist samstundis.