Ekkert bítur á Bóksölu stúdenta

Sumir segja sérstöðu Bóksölu stúdenta fyrst og fremst felast í sérfræðiþekkingu starfsfólks. Starfsaldur starfsfólks í búðinni styður við þessa kenningu, en búðinni helst vel á starfsfólki og er þekkt fyrir það.

Reynsla starfsfólksins og áratugalangt samstarf Bóksölunnar við erlend bókaforlög hefur áreiðanlega stuðlað að því að Bóksala stúdenta heldur velli þrátt fyrir erfið markaðsskilyrði og sterka samkeppnisaðila.

Bóksala stúdenta hefur það að meginmarkmiði að útvega stúdentum við Háskóla Íslands kennslubækur og önnur námsgögn á sanngjörnu verði. Hún á sér þó fleiri hliðar. Verslunin sinnir ekki einungis stúdentum við Háskóla Íslands heldur þjónustar hún jafnframt Háskólann í Reykjavík, Kennaraháskólann og Viðskiptaháskólann á Bifröst, auk þess sem hún á stóran hóp fastakúnna sem vill hvergi annars staðar kaupa bækur. Bóksalan er nefnilega ekki bara námsbókabúð heldur alhliða bókaverslun.

Af erlendu bókunum fer mest fyrir titlum á ensku en einnig er nokkuð úrval bóka á Norðurlandamálunum, sem og á þýsku, frönsku og spænsku, jafnvel forn-grísku og latínu. Íslenskar bækur skipa veglegan sess í Bóksölunni og þar er jafnframt gott úrval tölvubóka, fræði- og vísindarita, tímarita og umfangsmikil sérpöntunarþjónusta.

Traust verðstefna framar verðstríði

Bóksala stúdenta er ein af rekstrareiningum Félagsstofnunar stúdenta sem er sjálfseignarstofnun með sjálfstæða fjárhagsábyrgð. Að FS standa stúdentar innan Háskóla Íslands, Háskólinn og menntamálaráðuneytið.

Stofnunin byggir upp og rekur margháttaða þjónustu svo sem stúdentagarða, bóksölu, kaffistofur, stúdentamiðlun og leikskóla. 

Sigurður Pálsson, rekstrarstjóri Bóksölu stúdenta, segir bóksöluna lúta sömu lögmálum og annar rekstur. „Við leggjum ekki endilega allt undir til að vera ódýrust heldur höfum við frekar lagt áherslu á að verðstefnan sé skýr og þannig höfum við skapað okkur trúverðugleika.“

Þrátt fyrir að við nokkra stóra laxa sé að etja í samkeppninni um bóka- og ritfangasölu hefur Bóksölu stúdenta tekist að halda sínum sessi og býður í mörgum tilfellum lægra verð en samkeppnisaðilarnir. Samkeppni bókaverslana á milli er sérstaklega hörð þegar kemur að verðlagningu á ritföngum. Virkir á markaðnum eru Penninn, sem rekur meðal annars Bókabúð Máls og menningar, Eymundsson og Griffil, Oddi sem rekur tvær verslanir og keypti nýverið Skólavörubúðina, S.Á. Egilsson sem rekur Office One verslanirnar, auk stórmarkaðanna og annarra verslana.

Sigurður segir Bóksöluna vel samkeppnishæfa þar þótt ómögulegt sé að keppa við tilboð eins og „allt á krónu“ sem séu þar að auki villandi og samræmist ekki stefnu Bóksölunnar.

Samkeppnishæf við internetiðÞegar talið berst að íslenskum bókum segir Sigurður samkeppnina á smásölumarkaði ekki svo harðvítuga þótt innkoma Hagkaupa og Bónuss í jólavertíðinni hafi vissulega breytt ýmsu. Hann segir Bóksöluna hafa haldið sínum hlut og jafnvel aukið hann í jólabókasölunni eftir innkomu þeirra, þótt bitinn af kökunni sé ekki stór, enda leggi Bóksalan ekki allt undir í þeirri baráttu og haldi verði frekar jöfnu yfir árið. Hann segir jafnframt lítið svigrúm til verðsamkeppni á markaði íslenskra bóka þar sem staða útgáfufélagsins Eddu sé afar sterk.

Bóksalan tekur einnig þátt í framhaldsskólamarkaðnum en hefur að mestu staðið ein að háskólabókamarkaðnum hér á landi. Áratugalangt samstarf Bóksölunnar við erlendar bókaútgáfur stuðlar ábyggilega að þeirri styrku stöðu sem hún er í. Það má þó ekki gleyma stærsta samkeppnisaðilanum – internetinu. Sigurður segir bóksöluna hafa leitast við að bjóða bækurnar á sambærilegu verði og erlendar bókaverslanir á netinu. Þessu markmiði hafi hún náð, sem hafi aftur orðið til þess að hún njóti trausts og velvildar viðskiptavina.

Flytur á Háskólatorg að áriBóksala stúdenta hefur vaxið í beinu hlutfalli við vöxt háskólastigsins á Íslandi og aukast umsvif hennar ár frá ári. Þann 1. desember árið 2007 mun Bóksalan flytjast búferlum í fyrsta skipti og verða hluti af nýju Háskólatorgi sem er í byggingu á háskólalóðinni. Háskólatorg er samheiti tveggja bygginga á háskólasvæðinu, sem verða um 8.500 fm að stærð með tengibyggingum.

Ætlað er að Háskólatorg hýsi á þriðja hundrað starfsmenn auk þess sem 1.500 stúdentar verði þar við nám og störf daglega. Sigurður vonast til að breytingin verði til þess að bæta þjónustuna við námsmenn. Viðbúið er að einhverjar breytingar verði á skipulagi Bóksölunnar við þetta.

„Búðin mun klárlega þróast út frá eftirspurninni í húsinu,“ segir Sigurður. „Háskólabækurnar verða þó alltaf í brennidepli og við munum áfram leitast við að útvega námsfólki þær bækur sem það þarfnast og langar í á sanngjörnu verði.“