Báturinn er tilbúinn í slaginn við hvalina

"Nú fer hann bara á sinn stað og bíður átekta, það á eftir að gera sitt lítið af hverju en báturinn er til í slaginn," sagði Kristján Loftsson, framkvæmdastjóri Hvals hf., sem gerir út hvalveiðiskipin fjögur sem setið hafa við Ægisgarð síðan 1989, í tilefni þess að Hvalur 9 var útskrifaður úr slipp í gærdag.

Þegar hvalveiðiskipið var tekið í slipp á dögunum voru sextán ár liðin frá því að það var síðast yfirfarið. "Nú er hann alveg eins og barnsrass og til í hvað sem er," sagði Kristján, sem var augljóslega kampakátur í tilefni dagsins.

Að sögn Kristjáns var skrokkur skipsins í mjög góðu ástandi miðað við tíma í sjó. Skipta þurfti um eins fermetra bút undir sjólínu á stjórnborðssíðu skipsins og að sögn Kristjáns er það í fyrsta sinn sem það er gert frá því að skipið var byggt árið 1956.

Kristján segir ekkert því til fyrirstöðu að hvalveiðar hefjist hér við land að nýju í atvinnuskyni, en neitar að hafa fengið vilyrði um kvóta frá sjávarútvegsráðuneytinu. "Hvalur 8 er í svipuðu standi nú og Hvalur 9 var og ég fer með hann í slipp um leið og gefinn verður út kvóti," segir Kristján. "Hvalstofnarnir hér við land þola vel veiðar og hafa alltaf gert, hvalirnir bíða bara sallarólegir eftir skutlinum."