Reynir að synda yfir Ermarsund á morgun

Sjósundkappinn Benedikt Lafleur reynir á morgun að synda yfir Ermarsund en hann hefur undanfarið dvalið í Englandi við æfingar fyrir sundið. Líklegt er að hann leggi af stað frá ströndum Englands um hálfníuleytið í fyrramálið. Benedikt sagði í samtali við fréttastofu í morgun að aðstæður þessa dagana væru hinar ákjósanlegustu, mjög heitt væri í Dover og sjávarhitinn hefði aðeins þokast upp á við. Ermarsund Benedikts er farið gegn mansali og er hægt að heita á hann í gegnum áheitasímana 905 2020 og 562 3500.