Starfsemi IG í Maryland lögð af

Icelandic USA, dótturfélag Icelandic Group, ætlar að loka verksmiðju sinni í Cambridge í Maryland. Í verksmiðjunni fara á milli þrjátíu og fjörutíu prósent af framleiðslu Icelandic.

USA fram og þar starfa um það bil fjögur hundruð manns. Ekki stendur til að bæta við nýrri verksmiðju þar sem félagið getur sinnt allri framleiðslu og dreifingu fyrirtækisins í verksmiðju sinni í Newport News í Virginíu og í nýlegri dreifingarmiðstöð á sömu slóðum. Smám saman verður dregið úr starfseminni í Cambridge þar til henni verður alfarið hætt í árslok 2007.

Lokunin mun, samkvæmt tilkynningu frá Icelandic Group, fela í sér 0,8 milljarða króna virðisrýrnun sem mun gjaldfærast á fjórða ársfjórðungi 2006. Þar að auki muni falla til um 0,4 milljarða króna kostnaður vegna endurskipulagningar á sama ársfjórðungi.

Í Morgunkorni Glitnis segir að með þessu sé ljóst að rekstrarmarkmið félagsins, um 55 milljóna evra EBITDA-framlegð, sem eru um fimm milljarðar króna, fyrir árið í heild muni ekki nást. Allt stefni í að árið verði litað af slökum rekstrarárangri og mikilli endurskipulagningu eins og árið 2005. Björgólfur Jóhannsson, forstjóri Icelandic Group, segir að nú sjái brátt fyrir endann á mikilli endurskipulagningu innan samstæðunnar.

 „Þær miklu breytingar sem hafa verið keyrðar í gegn á árinu munu skila sér í mun betri rekstrarárangri í ár en í fyrra, þótt enn megi gera betur. Lokun verksmiðjunnar í Cambridge mun hafa í för með sér betri rekstrarniðurstöðu þar sem nýting verksmiðju okkar í Newport News verður betri og rekstur hennar fyrir vikið hagkvæmari.“