Ný plata í vinnslu

Hljómsveitin Ghostigital heldur tónleika í Stúdentakjallaranum á laugardag. Sveitin er nýkomin úr tónleikaferð um Bandaríkin þar sem hún hitaði upp fyrir The Melvins.

„Það gekk rosalega vel. Við spiluðum á tuttugu tónleikum á um það bil mánuði. Aðdáendahópur Melvins er mjög tilraunakenndur og þeir eru mjög opnir og skemmtilegir,“ segir Curver Thoroddsen. „Við spiluðum bara tveir en fengum stundum gesti á gítarinn.“ Á meðal gesta var kunningi Curvers frá Boston, skipuleggjandi tónleikaferðarinnar, og náungi sem hafði keyrt í sjö klukkutíma til að sjá hljómsveitina á tónleikum.

Að sögn Curvers er Ghostigital að vinna að sinni þriðju plötu. Byrjuðu þeir félagar að vinna hana meðan á tónleikaferðinni stóð. Ætla þeir í hljóðver í næsta mánuði til að hefja upptökur.

Að auki komu nýlega út á vínyl tvær endurhljóðblandanir eftir Gus Gus af lögunum Not Clean og Moneymaster. Voru þau gefin út af Pineapple Records.

Tónleikarnir á laugardag standa yfir frá kl. 23 til 1. Aðgangseyrir er 500 krónur. Stilluppsteypa og FM Belfast hita upp.