Núll prósent vextir

Japanski seðlabankinn hefur tilkynnt að stýrivextir verði enn um sinn núll prósent.

Fjárfestar höfðu átt von á hækkun stýrivaxta nú í sumar. Bankinn reynir nú að auka aðhald peningamálastefnunnar án þess að bæla bata efnahagslífsins og hefur stjórn seðlabankans gefið út að stýrivextir verði hækkaðir um leið og efnahagurinn sýni stöðug verðbólgueinkenni. Telur stjórnin núverandi efnahagsástand ekki gefa nægilegt tilefni til vaxtahækkana.

Hagvöxtur í Japan hefur verið stöðugur að undanförnu og jókst meira en búist var við á fyrsta ársfjórðungi þessa árs, eða um 3,1 prósent á ársgrundvelli. Var það fimmti ársfjórðungurinn í röð sem hagvöxtur jókst.