Straumhvörf á Alþingi

Samgönguáætlun - Einar Karl Haraldsson varaþingmaður Samfylkingarinnar Umfjöllun á Alþingi um samgönguáætlun til næstu fjögurra ára var fyrir margra hluta sakir afar merkileg. Ekki nóg með að talað væri þvert á flokkslínur heldur var heilögum kúm slátrað til hægri og vinstri. Í fyrsta lagi var blásið á þá kenningu að hægt sé að nota samgönguáætlun til sveiflujöfnunar í sjóðheitu hagkerfi. Einn eða tveir milljarðar til eða frá á ári mælast varla þegar árlegar fjárfestingar og lántökur fyrirtækja og banka eru taldar í hundruðum milljarða og stjórnvöld bæta enn í virkjana- og stóriðjuframkvæmdir. Þvert á móti var talið mikilvægt að útgjöld til vega og samgönguframkvæmda væru sem jöfnust og metnaður lagður í að standa við loforð og áætlanir. Fróðlegt verður að vita hvort þessi nýja hagfræðikenning hlýtur almenna viðurkenningu. Sumir stjórnarþingmenn telja ekki lengur á sig leggjandi að útskýra þann skollaleik fyrir kjósendum sem felst í því að lofa milljörðum til viðbótar í samgöngumál fyrir kosningar og svíkja það síðan að þeim loknum. Í öðru lagi gerðu þingmenn af höfuðborgarsvæðinu uppreisn gegn skiptingu vegafjár. Landsbyggðarkjördæmin hafa um árabil fengið um 80% í sinn hlut en höfuðborgarsvæðið um 20%. Þetta hlutfall er ósanngjarnt hvernig sem á það er litið og ljóst af umræðunni að við það verður ekki unað. Fjórir af hverjum fimm bílum landsmanna eru á höfuðborgarsvæðinu og um helmingur landsmanna. Sennilegt verður að telja að í framhaldi af þessari uppreisn muni þingmenn á höfuðborgarsvæðinu bindast samtökum um að knýja á um stærri sneið af kökunni. Ekki þarf að tíunda það að arðsemi vegaframkvæmda og öryggisumbóta á þessu svæði og tengingu þess við Suðurnes, Árborgarsvæðið og Borgarfjörð er margföld á við framkvæmdir í dreifðari byggðum. Í þriðja lagi eru að verða straumhvörf í umræðunni um flugvöll í Vatnsmýrinni. Það var augljóst af ræðum nokkurra þingmanna Sjálfstæðisflokksins í Reykjavík að verið er að undirbúa stefnubreytingu. Það má heita öruggt að borgarstjórnarflokkur þeirra setji það á oddinn í næstu kosningum að flugvöllurinn hverfi úr Vatnsmýrinni og verðmætasta byggingarland Íslands verði nýtt til þess að styrkja og bæta borgarbyggðina. Margir sjálfstæðismenn í Reykjavík hafa skilið rökin fyrir því að borgin endurheimti Vatnsmýrina og flytja þau nú af miklum þrótti. Athyglisvert var að enginn þeirra Sigurðar Kára Kristjánssonar, Guðlaugs Þórs Þórðarsonar né Péturs Blöndal hafði nokkurn áhuga á því samkomulagi sem samgönguráðherra og borgarstjóri hafa nýlega kynnt, enda virðist það vera biðleikur í pattstöðu. Þeir vilja flugstarfsemina burt, annaðhvort á annan stað á höfuðborgarsvæðinu eða til Keflavíkur. Sumir koma seint á ballið, en þó áður en samgönguráðherra leikur síðasta lagið,sem er bygging flugstöðvar til þess að festa flugvöllinn í Vatnsmýrinni næstu áratugi.