Framhaldsskóla í Mosfellsbæ

Menntamál - Jón Bjarnason, þingmaður Vinstrihreyfingarinnar, græns framboðs Mosfellsbær er tiltölulega ungt en vaxandi bæjarfélag með hátt í 6.700 íbúa og hlutfall ungs fólks í þeim hópi er hátt. Nú eru þar um 100 manns í hverjum árgangi á framhaldsskólaaldri og margir stærri árgangar á grunnskólaaldri. Engum blöðum er um það að fletta að Mosfellsbær er langstærsta sveitarfélag landsins sem ekki hefur eigin framhaldsskóla. Gert er ráð fyrir að íbúafjöldinn nái 8.000 á næstu fimm árum og verði um 10.000 árið 2012. Án efa er það nálægðin við Reykjavík sem mestu veldur um það að Mosfellsbær hefur setið eftir í uppbyggingu framhaldsskólakerfisins á undanförnum áratugum. Mosfellsbær fer með um 12% af áætluðum kostnaði við Borgarholtsskóla sem er sá framhaldsskóli í Reykjavík sem er næst sveitarfélaginu. Almenningssamgöngur milli Mosfellsbæjar og Borgarholts eru hins vegar ekki nógu góðar til að gera Borgarholtsskóla að ákjósanlegum kosti fyrir framhaldsskólanema í Mosfellsbæ, umfram aðra framhaldsskóla á höfuðborgarsvæðinu. Það gefur auga leið að sú staðreynd ýtir undir einkabílanotkun þeirra sem þaðan þurfa að sækja framhaldsskóla til nágrannasveitarfélaganna og eykur umferð um Vesturlandsveg á álagstímum. Bæjarstjórn Mosfellsbæjar hefur nú um nokkurt skeið haft hug á að taka upp viðræður við ríkisvaldið um stofnun framhaldsskóla í bænum. Frá þessu greindu fulltrúar hennar á fundi með fjárlaganefnd haustið 2002 og aftur 2003 og 2004. En ekkert hefur gerst í málinu. Gert er ráð fyrir framhaldsskóla á aðalskipulagi bæjarins og slíkur skóli mundi styrkja innviði sveitarfélagsins verulega. Blómlegt félags- og tómstundastarf byggist jafnan upp í kringum starf einstakra framhaldsskóla, sem gefa hverju byggðarlagi tækifæri til að styrkja sérstöðu sína með samstarfi við skólana. Framhaldsskóli í Mosfellsbæ gæti því hæglega þjónað fleirum en heimamönnum ef þar byggðist upp sérhæft nám að einhverju leyti, t.d. á sviði heilsueflingar og ferðaþjónustu sem nú þegar standa sterkum fótum í bæjarfélaginu. Enn fremur gæti orðið hentugt fyrir íbúa í Grundarhverfi, á Kjalarnesi, á Álfsnesi, í Kjós og nýju hverfi við Úlfarsfell að sækja slíkan skóla vegna nálægðarinnar. Að mati okkar þingmanna Vinstri-Grænna er stofnun framhaldsskóla í Mosfellsbæ eitt brýnasta verkefni fyrir íbúana á þessu svæði. Framhaldsskóli er einn af hornsteinum hverrar byggðar og skiptir gríðarlegu máli í uppbyggingu heildstæðs samfélags. Nú er svo sannarlega komið að Mosfellsbæ. Ríkið ber ábyrgð á stofnun og rekstri framhaldsskólans. Við, þingmenn Vinstrihreyfingarinnar - græns framboðs, höfum lagt fram tillögu um að Alþingi feli menntamálaráðherra að hefjast handa um uppbyggingu framhaldsskóla í Mosfellsbæ með það að markmiði að sá skóli taki til starfa innan tveggja ára. Allt mælir með því að gengið verði í þetta mál og yfirvöld hafa tekið nokkuð vel í það. Það er ekki eftir neinu að bíða.