Verðlag hækkar umfram spár

Spáð var að verðlag stæði í stað milli nóvember og desember. Það stóðst ekki og er verðbólga enn fyrir ofan þolmörk Seðlabankans. Vísitalan sem mælir breytingar á verði neysluvara hækkaði um 0,36 prósent milli nóvember og desember. Hagstofa Íslands tilkynnti þetta í gær.

Er þetta meiri hækkun neysluverðsvísitölunnar en greiningadeildir bankanna höfðu spáð. Gerður starfsmenn þeirra ráð fyrir að verðlag myndi hækka mest um 0,1 prósent milli mánaða. Í fréttum greiningardeildar Íslandsbanka segir að spáskekkjan stafi einkum af verðhækkun á dagvörum umfram spá og af gjaldskrárhækkun fyrir símaþjónustu. Matvöruverð hafi einnig hækkað lítillega umfram spá og leigurverð talsvert, sem hefur þó lítið vægi í vísitölunni.

Greiningardeild KB banka segir að hækkun á verði fatnaðar komi á óvart. Styrking kr""onunnar hefði frekar átt að leiða til lækkunar. Síðastliðna tólf mánuði hefur vísitala neysluverðs hækkað um 4,1 prósent, sem er langt yfir verðbólgumarkmiði Seðlabankans. Miðar Seðlabankinn við að verðbólgan sé í kringum 2,5 prósent og víkji ekki meira en 1,5 prósent frá því markmiði. Í síðasta mánuði var tólf mánaða verðbólga 4,2 prósent. Sé ekki tekið tillit til hækkun húsnæðisverðs í þessum tölum hækkaði verðbólgan um 0,7 prósent síðustu tólf mánuði. Þar er rót verðbólgunnar að finna.

Greiningardeild KB banka telur að dregið hafi úr spennu á fasteignamarkaði og því muni þessi áhrif fjara út á nýju ári. Í fréttum Íslandsbanka segir að Seðlabankinn hafi ítrekað hækkað stýrivexti á síðustu misserum til að slá á þenslu í hagkerfinu. "Stýrivextir bankans standa nú í 10,5 prósentu og reikna má með frkari vaxtahækkun á næstunni. Mikil spenna á vinnumarkaði stuðlar að launaskriði um þessar mundir og eykur það á undirliggjandi verðbólguþrýsting í hagkerfinu." Seðlabankinn tilkynnir næstu vaxtaákvörðun 26. janúar. Þegar þetta var ljóst í gærmorgun styrktist gengi krónunnar og ávöxtunarkrafa verðtryggða skuldabréfa lækkaði.