Kaupás á leið frá Búri

Kaupás, sem rekur matvöruverslunarkeðjurnar Krónuna, Nóatún og 11-11, hefur fært töluverðan hluta af innkaupum sínum út úr Búri ehf., sem er sameiginlegt innkaupa- og dreifingarfyrirtæki Kaupáss, Samkaupa og Olíufélagsins og er í eigu sömu aðila. Ekki er ólíklegt að frekari breytingar verði á samstarfi Kaupáss og Búrs á næstu misserum. "Við áttuðum okkur fljótlega á því, eftir að Norvik keypti Kaupás, að ef við ætluðum að eiga möguleika á því að bjóða hagstæðari verð til neytenda þá þyrftum við að hafa meira forræði yfir okkar málum heldur en við vorum að fá," segir Sigurður Arnar Sigurðsson, forstjóri Kaupáss. "Kaupás er að gera ákveðnar breytingar á sínum innkaupum sem felast í því að þeir taka að sér innkaup á innlendri þurrvöru, það er að segja vörur sem eru keyptar eingöngu af heildsölum," segir Sigurður Á. Sigurðsson, framkvæmdastjóri Búrs. Framkvæmdastjóri Búrs segir að eftir sem áður verði samstarf í innflutningi á þurrvöru og innkaupum á ávöxtum og grænmeti en viðurkennir að allmikil breyting verði á starfseminni hjá Búri og velta dragist saman. Stjórnendur félagsins búast við að velta félagsins verði einum milljarði minni á þessu ári en því síðasta. Í fyrra velti Búr um sex milljörðum króna. "Búr er ekki hagnaðareining og er rekið á kostnaðargrunni. Gjaldtaka okkar af okkar viðskiptavinum er eingöngu til að mæta beinum kostnaði. Fyrirtækið er þó rekið réttu megin við núllið," segir hann. "Við erum að stíga út úr þessu samstarfi, stofnum okkar eigið vöruhús og semjum við birgja á okkar eigin forsendum um þessar vörur. Þetta er hluti af þeim aðgerðum sem farið var í á þessu ári, að staðsetja Krónuna jafnfætis Bónus í verði. Þá var talið nauðsynlegt að gera skipulagsbreytingar hvað varðar innkaup og það er þess vegna sem við erum í þessum aðgerðum," segir forstjóri Kaupáss.