1000 njósnarar í Ástralíu

Kínversk stjórnvöld hafa yfir eitt þúsund njósnara og uppljóstrara í Ástralíu að sögn tveggja kínverskra embættismanna sem hafa beðið þar um hæli. Chris Ellison, dómsmálaráðherra Ástralíu, sagði á þingi í dag að ástralska leyniþjónustan væri að rannsaka fullyrðingar flóttamannanna tveggja. Annar þeirra er Chen Yonlin sem var ritari í ræðismannsskrifstofu Kína í Sydney. Hann er nú í felum ásamt fjölskyldu sinni af ótta við að honum verði rænt og hann fluttur til Kína. Ástralskir öryggisverðir gæta fjölskyldunnar. Yonlin segir að hans persónulega hlutverk í sendiráðinu hafi verið að njósna um og hrella meðlimi Falun Gong hreyfingarinnar í Ástralíu. Hann hafi hins vegar verið lítill möskvi í neti eitt þúsund njósnara og uppljóstrara sem Kínverjar hafi í Ástralíu. Annar hælisleitandi, Hao Fengjun, sem segist vera fyrrverandi foringi í kínversku öryggisþjónustunni, hefur stutt fullyrðingar Chens. Kínverskir flótamenn sem þegar hafi fengið hæli í Ástralíu segja að þessar fullyrðingar komi þeim ekki á óvart. Kína reki umfangsmikla njósnastarfsemi um allan heim, bæði iðnnjósnir og hernaðarlegar.