Langt frá samkomulagi um aðstoð

Átta helstu iðnríki heims eru langt frá því að ná samkomulagi um hvernig eigi að aðstoða Afríku við að rísa upp úr fátækt og neyð. Leiðtogarnir eru allir sammála um að veita Afríku veglega aðstoð en þeir geta hins vegar ekki komið sér saman um hvernig eigi að fara að því. Fundur fjármálaráðherra þeirra stendur nú yfir í Lundúnum þar sem Bretar eru í forsæti ríkjanna átta þetta árið. Bretar hafa sett fram ákveðnar hugmyndir. Þeir vilja að skuldir Afríkuríkja verði að mestu leyti strikaðar út og að þeim verði veittur verulegur fjárhagsstuðningur að auki. Skuldirnar sem yrðu strikaðar út nema um 40 milljörðum dollara. Frakkar, Þjóðverjar og Japanar eru ekki sannfærðir um að þetta sé rétta leiðin. Fjármálaráðherrarnir segjast þurfa að taka mið af sínum eigin efnahagsvanda sem felst meðal annars í litlum hagvexti í Evrópu og Japan, gríðarlegum greiðsluhalla í Bandaríkjunum og mikilli spennu yfir fjármálastefnu Kínverja.