Klæðskerasaumuð líffæri

Tekist hefur að búa til einstaklingsmiðaðar stofnfrumur. Það getur orðið til þess að innan skamms geti sjúklingar fengið líffærahluta sniðna að sínum þörfum. Hópi vísindamanna í Suður-Kóreu hefur tekist að búa til stofnfrumur af þessu tagi með því að taka frumkjarna úr ellefu sjúklingum og setja þá í gjafaegg úr konum. Nokkrum dögum eftir að eggin höfðu skipt sér í tilraunglösum voru stofnfrumurnar fjarlægðar. Þó að enn sem komið er hafi sjúklingarnir ekkert gagn af stofnfrumunum er vonast til þess að innan skamms verði hægt að búa til frumuvefi eða jafnvel líffærahluta í menn með þessu móti. Næsta skrefið er að komast að því hvernig þróa megi stofnfrumurnar í einhverja tiltekna frumutegund. Í kjölfarið gæti þetta svo nýst til lækninga á Parkinson-sjúkdómnum, sykursýki og eins til þess að laga skemmdir í mænu og taugum. Þar sem stofnfrumur sem eru búnar til með þessum hætti eru sérstaklega fyrir þann einstakling sem í hlut á binda margir vonir við að þetta gæti í framtíðinni leitt til þess að hægt verði að rækta og sníða stofnfrumur algjörlega með tilliti til hvers sjúklings fyrir sig. Þá er engin hætta á að líkaminn myndi hafna líffærahlutum sem yrðu ræktaðir með þessum hætti þar sem frumukjarninn kemur úr þeim einstaklingi sem í hlut á.