Uss, einhver er að hlusta!

Eftirlit með þegnunum - Haukur Logi Karlsson Nú veit ég ekki hvað ykkur hinum finnst. Get þó sagt fyrir mitt leyti að ég vil geta talað við vini mína í friði án þess að eiga það yfir höfði mér að virðulegur starfsmaður ríkisins sé mögulega að taka upp á band mismerkilegan munnsöfnuðinn. Nú er ég ekki að gefa í skyn að samtöl mín við frændur og fjendur séu þess eðlis að þoli ekki dagsins skímu. Á mér sem dæmi ekki leynilega hjákonu sem er gift ríkum bankastjóra. Er ekki heldur að plana fjandsamlega yfirtöku á S-hópnum eða undirbúa óvænt kjölfestutilboð í hlutabréf Símans. Meira venjuleg samtöl um það sem engan ætti að varða sérstaklega um. Eða það hélt ég í það minnsta þangað til ég las Moggann um daginn. Það virðist vera á prjónunum hjá Sjálfstæðisflokknum að sjá til þess að ég tali ekki mikið af mér við annað fólk. Hafa sennilega frétt að mér er meinilla við að símanúmerið mitt sé skráð af opinberum aðilum. Slepp þannig við leiðindasímtöl við fólk sem ég hef engan áhuga á að tala við. Sölumenn hafa ekki hringt í mig svo árum skiptir og ég man ekki til þess að hafa tekið þátt í skoðanakönnun um ævina. Hef varið mitt leynilega símanúmer með kjafti og klóm fyrir ásælni yfirvalda öll þessi ár. Hef lent í nokkrum kyndugum uppákomum í gegnum tíðina þar sem ég hef borið því við að eiga ekki síma aðspurður um númerið mitt. Fæ oftast einkennilegt lúkk frá viðkomandi eins og ég hafi eitthvað að fela. Set þá bara upp krimmaaugnaráðið til að kovera söguna. Friðurinn er sem sagt brátt úti. Það verður bannað með lögum að tala við fólk í síma án þess að lögreglan hafi möguleika ekki aðeins á að hlera símtalið heldur einnig að vita hver á númerið og geta út frá því fylgst með ferðum viðkomandi í gegnum einhvern hi-fi rafeindabúnað sem ég skil ekki. Ansi útsmogin leið hjá þeim til að ná loksins í númerið mitt. Langar augljóslega mikið til að spjalla við mig. Yfirvarpið er ekki síður klaufalegt. Þeir vilja koma í veg fyrir að ég sendi fólki SMS-skilaboð. Kannski tími til kominn. Holan í röksemdafærslunni að vísu vandræðalega áberandi. Hélt að allir hefðu heyrt um internetið og möguleikanna á nafnlausum SMS- og tölvupóstskeytum þaðan. Sé fyrir mér nýjar víddir af svartamarkaðsbraski með notuð símanúmer og Hotmail-adressur. Sjálfur gæti ég farið á bensínstöðina og splæst í 20 símanúmer. Auglýst þau svo í smáauglýsingum DV á góðu verði. Óskráð netfang í kaupbæti, fullum trúnaði heitið. Örugglega fínn peningur. Það er tillaga mín til Sjálfstæðisflokksins að hann hætti tilraunum til að troðast inn í einkalíf fólks. Markmiðin nást augljóslega ekki án þess að fórna meiri hagsmunum fyrir minni. Glæpamennirnir aðlaga sig að reglunum á fyrsta degi með sínum aðferðum en eftir sitjum við hin í þjóðfélagi þar sem fylgst er með hverri hreyfingu og jafnvel hverju samtali. Þannig þjóðfélag vil ég ekki. Fólk á að geta talað saman í friði fyrir stjórnarherrum Sjálfstæðisflokksins í samgöngu- og dómsmálaráðuneytunum.