Skrefi nær lýðræðinu

Stjórnlagaþing Íraka kemur saman í fyrsta sinn í dag þótt enn vanti herslumuninnn upp á að leiðtogar Kúrda og bandalags sjía nái að mynda stjórnarmeirihluta. Að minnsta kosti fimm manns fórust í sjálfsmorðssprengjuárásum í landinu í gær. Síðan Írakar gengu til kosninga í janúarlok hafa sigurvegarar þeirra setið við samningaborðið og reynt að mynda meirihluta sem mun leggja línurnar á stjórnlagaþinginu sem kemur saman í dag. Sjíabandalagið svonefnda og sameinað framboð Kúrda fengu tvo þriðju hluta þingsætanna 275, sem nægir til að koma málum í gegnum þingið. Fyrsta verkefni stjórnlagaþingsins verður að kjósa forsætisnefnd en sú nefnd mun aftur skipa forsætisráðherra sem mun velja með sér ríkisstjórn. Þegar hefur náðst samstaða um hverjir skipa helstu embætti. Jalal Talabani, annar valdamestu stjórnmálamanna Kúrda, verður oddviti forsætisnefndarinnar og þar með forseti en Ibrahim al-Jaafari, leiðtogi Dawa-flokks hófsamra sjía, sest í stól forsætisráðherra. Allar líkur eru á að súnníar fái embætti þingforseta enda er það lykilatriði eigi einhver von að vera til friðar. Hefur nafn Ghazi al-Yawer, núverandi forseta bráðabirgðastjórnarinnar, verið nefnt í því sambandi. Að öðru leyti mun stjórnlagaþingið setja lög og útbúa stjórnarskrá sem síðan verður borin undir þjóðaratkvæði í haust. Verði hún samþykkt verður gengið til þingkosninga í desember. Athygli vekur að Kúrdar og sjíar hafa lýst yfir vilja til að Írak verði skipt upp í sambandsríki súnnía, sjía og Kúrda með valdalítilli alríkisstjórn í Bagdad. Víst er að sú tillaga á eftir að mæta andstöðu súnnía enda lenda flestar olíulindir innan svæða sjía og Kúrda. Róstusamt var í Írak í gær venju samkvæmt. Fjórir borgarar létust í bílsprengjuárás í Bagdad og skömmu síðar dó barn í annarri sprengjuárás í borginni. Yfirvöld í Najaf handtóku í gær mann sem grunaður er um að hafa staðið fyrir mannskæðu sprengjutilræði í ágúst 2003. 85 manns biðu þar bana, þar á meðal Mohammad Baqir al-Hakim, erkiklerkur og einn leiðtoga sjía.