Stór loforð jafnaðarmanna

Danskir jafnaðarmenn freista þess að ná til kvenna á ný með því að lofa opinberum starfsmönnum að enginn þeirra missi vinnuna næstu fjögur árin. Í gær var sagt frá því að níu af hverjum tíu, sem hafa yfirgefið danska Jafnaðarmannaflokkinn í kosningabaráttunni fyrir þingkosningarnar, væru konur. Í fréttum Stöðvar 2 og Bylgjunnar í gær var sagt frá því að níu af hverjum tíu, sem hafa yfirgefið danska Jafnaðarmannaflokkinn í kosningabaráttunni fyrir þingkosningarnar, væru konur. Sumar kannanir sýna að flokkurinn gæti fengið verstu útreið í 30 ár og formaðurinn, Mogens Lykketoft, er sagður valtur í sessi. Nú hefur hann lagt fram trompið sem á að höfða til kvenna. Flestir opinberir starfsmenn eru konur og Lykketoft lofar þeim starfsöryggi næstu fjögur árin en framundan eru miklar sameiningar á sveitarfélögum og ótti innan opinbera geirans um störf. Anders Fogh Rasmussen forsætisráðherra boðaði til þingkosninganna svo snemma því hann taldi nauðsynlegt að gefa svigrúm í samfélaginu fyrir umræðuna um sameiningu sveitarfélaga með vorinu en kosið verður til sveitarstjórna í haust. Rasmussen og aðrir stjórnarleiðtogar hafa þó ekki gengið svo langt sem Lykketoft gerir nú með því að heita starfsöryggi hjá hinu opinbera næstu fjögur árin. Þeir hafa þó sagt að reynt verði að finna störf handa öllum. Lykketoft segir við Jyllands Posten í morgun að suma opinbera starfsmenn geti þó þurft að færa milli starfa en í þeim tilfellum verði fólki tryggð nausynleg eftirmenntun og það feli í sér að áfram verði þörf fyrir alla. Við Politiken í morgun segir hann að flestir opinberir starfsmenn séu konur og staðreyndin sé sú að mörg þúsund störf í opinbera geiranum séu að hverfa og við því þurfi að bregðast. Lykketoft er því ekkert að fela taktíkina. Róttækir vinstri menn og Sósíalski þjóðarflokkurinn styðja hugmynd Lykketofts en Marianne Jelved, formaður róttækra vinstrimanna, hefur fengið góðan byr í seglin í könnunum og gæti farið í meirihlutasamstarf með ríkisstjórnarflokkunum. Hún hefur hins vegar lýst því yfir að hún gangi til þessara kosninga með það að markmiði að skipt verði um stjórn. Má því segja að yfirlýsing flokks hennar og Sósíalska þjóðarflokksins sé sameiginleg rödd stjórnarandstöðu sem vilji ná völdum. Mörg og hástemmd loforð heilla þó ekki alla. Þannig sýnir ný könnun að 45 prósent danskra kjósenda segja minna mark takandi á stjórnmálamönnum í baráttunni nú en fyrir síðustu kosningar árið 2001.