Heilbrigðisvandi þjóðarinnar

Hreyfing og heilsa - Gunnar Örn Örlygsson alþingismaður Aldrei áður hefur heilbrigðisvandi þjóðarinnar verið alvarlegri. Ríkisstjórn Íslands lokar flestum skilningarvitum fyrir vandanum en hann greinist bæði sem andlegur og líkamlegur krankleiki hjá tugþúsundum Íslendinga. Reikningur okkar allra til heilbrigðis- og sjúkraþjónustu fer ört vaxandi og gerir atlögu að efnahag þjóðarinnar. Frjálslyndi flokkurinn ákvað á síðasta haustþingi að leggja fram þingsályktunartillögu þar sem ríkisstjórninni er gert að leggja fram áætlun um heilsu og íþróttir. Slíkar áætlanir hafa fyrir löngu sannað gildi sitt og nægir þar að nefna til jafnréttisáætlun ríkisstjórnarinnar sem unnin er af Alþingi í félagi við fjölmarga aðila, s.s. sveitarfélög, sérfræðinga á ýmsum sviðum, stéttarfélög, samtök atvinnurekenda og fl. Það nægir ekki að einstakir ráðherrar með löglærða aðstoðarmenn reyni af góðum hug að finna töfralausn á heilbrigðisvanda þjóðarinnar. Aftur á móti er hugsanlegt að stjórnvöld, stéttarfélög, atvinnurekendur, sveitarfélög, sérfræðingar úr heilbrigðisstétt og síðast en ekki síst íþróttahreyfingin geti hrundið af stað ferli með öflugu samátaki með það að markmiði að bæta almenna heilsu þjóðarinnar. Stjórn Læknafélags Íslands hefur ítrekað á undanförnum misserum lagt áherslu á mikilvægi þess að löggjafinn komi að málum, t.a.m. með öflugri heilsuáætlun sem bundin yrði í lög. Fjöldi öryrkja á Íslandi hefur tvöfaldast á síðustu 10 árum. Þá hafa sjúkdómar þunglyndis og annarra andlegra veikinda stóraukist. Heilsan okkar er afar dýrmæt en því miður hafa aðgerðir ríkisstjórnarinnar á þessu sviði yfirleitt komið of seint. Það dugar ekki að mæta vandanum eftir að hann er orðinn, miklu frekar ætti dreifing fjármagns í meira mæli að renna til fyrirbyggjandi þátta svo sem íþróttamála. Ætti þá að huga að almenningsíþróttum jafnt sem afreksíþróttum. Tryggja verður aðgengi allra barna að íþróttum en í þessu skyni má minna á Hafnarfjarðarbæ, sem tryggir aðgengi allra barna að keppnisíþróttum óháð efnahag. Ekki þarf að minna á árangur Hafnfirðinga á sviði íþrótta en hann er frábær. Þá er hugsanlegt að yfirvöld bjóði eldri borgurum góð kjör til vistar á suðlægum slóðum yfir skammdegið og kuldatímann. Íslenskir verktakar bentu mér á þá snjöllu hugmynd að íslensk yfirvöld semji við íslenska verktaka um leigu á stórhúsnæðum í Suður-Evrópu. Varla þarf að efast um gildi slíkra ferða fyrir fullorðið fólk, sem margt á erfitt með að ferðast sökum veðráttu hér heima fyrir yfir köldustu og dimmustu vetrarmánuðina. Einangrun og skammdegi er sjaldan vísir að gleðistund fyrir okkur mannfólkið. Í heilsu– og íþróttaáætlun skapast jafnframt kjörinn vettvangur fyrir forvarnir af ýmsu tagi, t.a.m. gegn fíknefnaneyslu, reykingum, óhollu mataræði og áfengisneyslu. Því miður fékk þetta ágæta þingmál sem getið er að ofan ekki þá afgreiðslu sem til þurfti. Málið verður aftur sett fram nú á vorþingi og er það gert með þá von í brjósti að stjórnvöld sjái hversu kjörinn vettvangur Alþingi Íslendinga er, sem starfstöð áætlunar til heilsu– og íþróttamála í landinu.