Yfirtaka síðasti kostur

Skarphéðinn Berg Steinarsson, framkvæmdastjóri hjá Baugi, segir að það hefði verið síðasti kostur í stöðunni að fara í yfirtöku á FL Group. "Okkur líður mjög vel með FL Group skráð og held að það sama eigi við um aðra hluthafa." Yfirtökuskylda Baugs Group í FL Group hófst þegar hlutafjárútboði í síðarnefnda félaginu lauk þann 10. nóvember.

Samkvæmt lögum um verðbréfaviðskipti hefði Baugur líklega þurft að bjóða 14,05 krónur til annarra hluthafa í FL Group ef félagið hefði kosið að taka félagið yfir. Tilboðsverð skal vera að lágmarki jafnhátt og síðasta viðskiptaverð var daginn áður en tilboðsskylda myndaðist. Fullvíst má telja að yfirtakan hefði ekki gengið eftir þar sem núverandi markaðsgengi FL Group er 17,7 krónur á hlut eða rúmum fjórðungi hærra en tilboðsverð. Greiningardeild KB banka segir að niðurstaða yfirtökunefndar í máli Baugs Group og FL Group skilji eftir fleiri spurningar en hún svari.

Baugur Group og Oddaflug seldu um tíu prósent til Landsbankans og gerðu samhliða afleiðusamninga um hlutina sem færir atkvæðisréttinn til bankans en alla áhættu og ávinning af gengisþróun bréfanna á seljendur. KB banki spyr hvort bankinn muni kjósa gegn viðskiptavinum sínum á hluthafafundi og hvort það sé heppilegt fyrir aðra hluthafa að einn hluthafi fari með tíu prósenta eignarhlut en hafi ekki fjárhagslega áhættu af bréfunum. Veltir bankinn fyrir sér stöðu Yfirtökunefndar: ""Afleiðusamningar" sem urðu til þess að komist var hjá yfirtökuskyldu hljóta að setja yfirtökunefndina í vanda. Það liggur í hlutarins eðli að fyrst hægt er að hanna samninga með þessum hætti til að komast hjá yfirtökuskyldu verða úrræði nefndarinnar að teljast bitlítil."

Skarphéðinn Berg var spurður að því hvort komið hefði til greina að selja hlutina til nokkurra fjárfesta og dreifa þar með eignarhaldinu á FL Group. Hann segir að viðskiptin á miðvikudaginn séu góð lausn fyrir alla aðila og seljendur njóti góðs af þeirri áhættu sem þeir tóku í hlutafjárútboðinu, sem engan hafði órað fyrir að myndi ganga það vel sem raun bar vitni. Jónas Fr. Jónsson, forstjóri Fjármálaeftirlitsins, sagði í samtali við Fréttablaðið að starfsmenn stofnunarinnar hefðu ekki kynnt sér álit yfirtökunefndar í máli FL Group og því gæti hann ekkert sagt um hvort málið yrði skoðað frekar.