Aðeins tvö félög hafa hækkað

Rólegt hefur verið á hlutabréfamarkaði undanfarna daga en Úrvalsvísitalan hefur sigið upp á við eftir mikla niðursveiflu um miðjan október. Þrátt fyrir að vísitalan hafi hækkað á ný er verð á sumum fyrirtækjum enn mun lægra en það var fyrir rúmum mánuði. Þau fyrirtæki sem lækkað hafa mest eru Landsbankinn, Burðarás og Actavis. Allt eru þetta fyrirtæki sem eru að stórum hluta í eigu Björgólfsfeðga og höfðu Burðarás og Landsbankinn hækkað mjög hratt á haustmánuðum. Matvælaframleiðandinn Bakkavör hefur einnig lækkað um meira en tuttugu prósent. Marel, Íslandsbanki og Medcare Flaga eru öll örlítið lægri en en þau voru 8. október og tvö fyrirtæki hafa hækkað lítillega. "Þetta er eðlilegt í því ljósi að bæði Landsbankinn og Burðarás eiga stórt safn innlendra hlutabréfa. Hvað varðar Actavis þá var síðasta uppgjör hjá félaginu nokkuð undir væntingum," segir Atli B. Guðmundsson hjá greiningardeild Íslandsbanka. Töluverð hreyfing hefur verið á verði hlutabréfa í Actavis en nú er verðið svipað og það var í upphafi árs. Þann 8. október stóð Úrvalsvísitalan í 3.947 stigum en var 3.406 stig í gær. Lækkunin er því um fjórtán prósent. Hún hefur því skipst mjög misjafnlega á fyrirtækin sem mynda Úrvalsvísitöluna. Úrvalsvísitalan er þó enn miklum mun hærri en í upphafi árs. Hækkunin síðan þá er 62 prósent. Þetta er langtum meiri hækkun á hlutabréfamörkuðum í löndunum í kringum okkur. Fjárfestingarfélagið Atorka hefur þrefaldast að verðgildi og Landsbanki, KB banki og Marel hafa tvöfaldast. Sérfræðingar telja að nú kunni að vera góð færi til að kaupa í ýmsum fyrirtækjum sem lækkað hafa á síðustu vikum enda er verð sumra þeirra komið undir verðmat greiningardeilda bankanna.