20 milljarða hækkun

Burðarás, Landsbanki, Íslandsbanki og Straumur hækkuðu í verði um tuttugu milljarða króna í viðskiptum í Kauphöll Íslands í gær. Þessi félög koma við sögu í samningum sem gerðir voru í fyrradag og tryggðu Burðarási, Landsbankanum og Landsbankanum Luxembúrg, stóran hlut í Straumi og Straumi tæplega fimmtán prósent hlut í Íslandsbanka. Aldrei hafa verið meiri viðskipti í Kauphöll Íslands. Viðskipti með hlutabréf voru 748 talsins. Umfang viðskipta í Kauphöllinni nam 37,4 milljörðum króna. Gamla metið var sett 19. september í fyrra. Þá námu viðskiptin um 31 milljarði króna. Úrvalsvísitalan hefur heldur aldrei verið hærri en nú. Hún fór yfir 3.800 stig í fyrsta sinn og hefur hækkað um 98 prósent frá því á sama tíma og í fyrra. Atburðarásin minnir mjög á það sem átti sér stað fyrir rúmu ári þegar fjárfestingarfélagið Straumur, sem nú er orðinn fjárfestingarbanki, var í hringiðu viðskipta sem meðal annars fluttu yfirráð yfir Eimskipi í hendur Björgólfsfeðga. Það var einmitt þá sem gamla metið í magni viðskipta í Kauphöll Íslands var sett. Sérfræðingar á hlutabréfamarkaði telja verðhækkun fjármálafyrirtækja fela í sér miklar væntingar um hagræðingu í rekstri. Þar hefur oftast verið talað um sameiningu Landsbanka og Íslandsbanka. Hins vegar liggur beinast við nú eftir kjölfestufjárfestingu Straums í Íslandsbanka að þau fyrirtæki verði sameinuð. Stórviðskiptin með bréf í þessum félögum í fyrradag hafa sett Landsbankamenn í lykilstöðu en jafnframt hafa möguleikar Íslandsbanka til að ráða ferðinni í hugsanlegum samruna við önnur fyrirtæki minnkað. Það sem af er ári hafa íslensku bankarnir hækkað hratt í verði. Landsbankinn hefur hækkað um 141 prósent og KB banki um 118 prósent. Gengi á bréfum Íslandsbanka hefur hækkað um 86 prósent. Á síðustu tólf mánuðum hefur undirvísitala í Kauphöllinni sem mælir fjármála- og tryggingafyrirtæki hækkað um 131 prósent síðustu tólf mánuði og hefur meira en tvöfaldast frá áramótum. Eftir viðskiptin í gær hafa Björgólfsfeðgar veruleg áhrif í fimm af tíu verðmætustu fyrirtækjum í Kauphöllinni. Þeir ráða för í Actavis, Landsbanka og Burðarási. Burðarás, Landsbankinn og Landsbankinn Luxembúrg ráða svo tæpum fjórðungi í Straumi og Straumur er kjölfestufjárfestir Íslandsbanka.