Reykskynjara á hvert heimili

Eldvarnaátak Landssambands slökkviliðs- og sjúkraflutningamanna (LSS) stendur nú sem hæst en það hófst laugardaginn 20. nóvember með útgáfu forvarnablaðsins Slökkviliðsmaðurinn. Blaðinu er dreift í 70 þúsund eintökum um land allt en í því eru meðal annars ítarlegar leiðbeiningar um eldvarnir heimilanna. Mánudaginn 22. nóvember hefja slökkviliðsmenn heimsóknir sínar í 3. bekk grunnskólanna, fræða börnin um eldvarnir og bjóða þeim að taka þátt í Eldvarnagetrauninni.

Vernharð Guðnason, formaður LSS, segir markmið átaksins að hvetja almenning til aðgerða í eldvörnum heimilanna til að draga úr líkum á tjóni á lífi og eignum vegna eldsvoða. Hann segir að reykskynjarar séu mikilvægasta forvörnin og þeir eigi fortakslaust að vera á hverju heimili í landinu.

"Reykskynjarar eru einföld og ódýr aðgerð til að tryggja að fólk fái viðvörun og nái að forða sér í tæka tíð þegar eldur kemur upp. Við biðjum fólk hins vegar að muna að reykskynjara þarf að prófa mánaðarlega, skipta þarf um rafhlöðu árlega og reykskynjarann sjálfan ekki sjaldnar en á tíu ára fresti. Við höfum því miður dæmi um að reykskynjarar hafi ekki komið að gagni vegna þess að þetta var vanrækt," segir Vernharð.

Til mikils að vinna

Að jafnaði farast um tveir einstaklingar í eldsvoðum hérlendis á ári hverju. Eldsvoðar valda árlega eignatjóni uppá um einn og hálfan milljarð króna. Reynslan sýnir að líkur á eldsvoðum aukast talsvert á aðventunni vegna mikillar notkunar rafmagns og kertaljósa.

Slökkviliðs- og sjúkraflutningamenn leggja því áherslu á að allir tileinki sér grunnatriði eldvarna:

· Aðvörun. Að virkir reykskynjarar, einn eða fleiri, séu á öllum heimilum til að tryggja að fólk verði strax vart við eld og reyk, nái að koma sér út og kalla eftir hjálp slökkviliðs í síma 1 1 2.

· Flótti. Að rýmingarleiðir séu tryggðar og allir viti hvernig þeir eigi að yfirgefa brennandi hús.

· Slökkvibúnaður. Að handslökkvitæki og eldvarnateppi séu á hverju heimili, fólk staðsetji búnaðinn rétt og kunni að nota hann. Einnig má nefna sjálfvirkan slökkvibúnað fyrir heimilistæki.

· Þekkja hætturnar. Að fólk geri sér grein fyrir helstu orsökum eldsvoða og kunni að forðast hætturnar.

· Tryggingar. Mikilvægt er að allir tryggi innbú sitt gegn hugsanlegu tjóni vegna eldsvoða.

Slökkviliðsmenn heimsækja grunnskólana – Eldvarnagetraunin 2004

Mikilvægur liður í átakinu er að slökkviliðsmenn heimsækja 3. bekk grunnskólanna í landinu dagana 22.-26. nóvember, gefa nemendum fræðsluefni um eldvarnir og bjóða þeim að taka þátt í Eldvarnagetrauninni 2004. Reynslan sýnir að börn eru mjög móttækileg fyrir fræðslu um eldvarnir og eru líkleg til þess að hafa áhrif á þær heimafyrir. Að átakinu loknu verður dregið úr réttum lausnum í Eldvarnagetrauninni og vegleg verðlaun afhent.

Slökkviliðsmaðurinn

Forvarnablað LSS, Slökkviliðsmaðurinn, er gefið út í 70 þúsund eintökum og dreift um allt land.

Í blaðinu er að finna góð ráð um eldvarnir heimilanna og er fólk hvatt til þess að hafa blaðið til taks á heimilinu. Fjallað er um mikilvægi reykskynjara, mismunandi gerðir þeirra, viðhald og rétta staðsetningu. Leiðbeint er um gerð flóttaáætlana, fjallað um slökkvibúnað, helstu orsakir eldsvoða og fleira. Í blaðinu er einnig athyglivert viðtal við fólk sem hefur lent í þeirri skelfilegu reynslu að missa eigur sínar í eldsvoða.