Slegist um Yukos

Lögsókn í Bandaríkjunum getur sett strik í reikninginn vegna fyrirhugaðrar sölu dótturfélaga Yukos upp í skattskuld. Vestrænir fjárfestar óttast að sala eigna Yukos fari fram á alltof lágu verði og hafa því farið fram á lögbann. Deutsche bank og fleiri evrópskar fjármálastofnanir hafa hætt við að veita lán til rússneska jarðgasrisans Gazprom vegna kaupa á Yuganskeneftegaz sem er dótturfyrirtæki Yukos. Rússnesk stjórnvöld fara fram á söluna til þess að fá upp í skattskuldir sem sagðar eru nema hátt í tvö þúsund milljörðum íslenskra króna. Uppboð á dótturfyrirtækinu átti að færa Yukos að lágmarki 6,4 milljarða evra (ríflega 500 milljarða króna) en sérfræðingar telja að rétt verð sé tvöfalt hærra. Fjárfestar óttast að fyrirtæki í eigu rússneska ríkisins, eða undir handjaðri þess, muni sölsa undir sig eignir Yukos á útsöluverði. Til að reyna að koma í veg fyrir slíkt hefur mál verið höfðað í Bandaríkjunum til að stöðva söluna. Af ótta við niðurstöðu dómstóla í Bandaríkjunum halda vestrænar fjármálastofnanir að sér höndum varðandi fjármögnun kaupanna. Yukos er eitt arðbærasta olíufyrirtæki heims og stendur undir um fimmtungi af olíuframleiðslu Rússlands.