Vilja nýjan úrskurð

Samtök banka og verðbréfafyrirtækja (SBV) hafa áfrýjað úrskurði Eftirlitsstofnunar EFTA (ESA) um að fyrirhuguð níutíu prósenta lán á vegum sjóðsins standist samkeppnisreglur á Evrópska efnahagssvæðinu. Bankarnir draga í efa að ákvörðunin hafi verið rétt og benda á að staða Íbúðalánasjóðs sé einsdæmi miðað við nágrannalöndin. Ein forsenda úrskurðar ESA er sú að Íbúðalánasjóður veiti félagslega þjónustu en bankarnir telja aðgerðir Íbúðalánasjóðs á síðustu vikum bendi eindregið til þess að sjóðurinn sé í beinni samkeppni við bankanna. Þetta telja bankarnir að stríði gegn reglum á Evrópska efnahagssvæðinu sem koma eiga í veg fyrir ríkisstuðning við fyrirtæki í samkeppnisrekstri. Í nýlegri könnun á vegum SBV kemur fram að 22,3 prósent svarenda hyggist ætla að taka annað hvort ný lán hjá bönkum og sparisjóðum eða endurfjármagna lán sín á næstu sex mánuðum. Sé þetta rétt má gera ráð fyrir að á fimmta tug þúsunda Íslendinga hafi í hyggju að gera breytingar á fjármögnun íbúðarhúsnæðis. "Við teljum að Íbúðalánasjóður sé í grímulausri samkeppni við bankana. Þetta hefur sést á viðbrögðum sjóðsins við þessum breyttu aðstæðum. Könnunin sem við gerðum sýnir skýrt að það er tímabært fyrir ráðamenn að setjast niður og skoða leiðir til að breyta eðli Íbúðalánasjóðs svo hann sinni þeim tilgangi sem upphaflega var farið af stað með; að veita félagsleg húsnæðislán," segir Guðjón Rúnarsson hjá SBV. Ekki er gert ráð fyrir niðurstöðu fyrr en í fyrsta lagi um mitt næsta ár.