Ísland í áttunda sæti

Ísland er í áttunda sæti á lista yfir 104 þjóðir þegar hagvaxtarlíkur á komandi árum eru metnar. Niðurstöður í alþjóðlegri rannsókn World Economic Forum voru kynntar í gær og þar kemur fram að Ísland fellur um tvö sæti. Í fyrra var Ísland í áttunda sæti. Finnland er efst á blaði eins og í fyrra og Bandaríkin í öðru sæti. Hin Norðurlöndin koma einnig vel út. Svíþjóð er í þriðja sæti, Danmörk í fimmta og Noregur í sjötta. Árið 1997 var Ísland í 38. sæti á listanum og segir Hallgrímur Jónasson, forstjóri Iðntæknistofnunar, að vera megi að ákveðið jafnvægi sé komið á eftir hraðstígar framfarir undanfarin ár. Hann segir ekki hægt að draga víðtækar ályktanir af því að Ísland falli niður um tvö sæti. "Það er í sjálfu sér hverfandi eða lítill munur þar á," segir Hallgrímur. Ísland fær 5,44 stig en Sviss, sem er í áttunda sæti, fær 5,49. Finnland er nokkuð öruggt í efsta sætinu með 5,95 stig. "Þessi vísitala á að gefa til kynna hagvaxtarhorfur næstu fimm til átta árin. Hún er sett saman úr tæknivísitölum annars vegar og hins vegar úr gæðum opinberra stofnana og efnahagskerfisins. Við komum langbest út varðandi gæði opinberra stofnana og höfum ákveðna yfirburði þar. Við komum sömuleiðis mjög vel út í samanburði á samskiptamálum. Þar er tekið tillit til fjölda internettenginga og þess háttar," segir Hallgrímur. Hann segir að Ísland komi hins vegar ekki vel út varðandi nýsköpun og frammistaða í þeim efnum dragi einkunnina niður. Að hans mati kann stærð landsins að ráða þar einhverju þar sem aðgangur að sérhæfðri rannsóknarþjónustu sé minni hér en í stærri samkeppnislöndum. "Þetta er svið sem við eigum að bæta og það eru skilaboðin sem við fáum," segir Hallgrímur.