Tvöfaldar framleiðslugetu

Lýsi reisir nú myndarlegt verksmiðjuhúsnæði við Fiskislóð á Örfirisey. Þeir sem átt hafa leið þar um hafa rekið upp stór augu yfir því óvenjulega vinnulagi sem er á byggingunni. Þar er búið að setja upp geymslutanka fyrir lýsi innan í grind hússins. Með nýju verksmiðjunni tvöfaldast framleiðslugeta fyrirtækisins. Að sögn Katrínar Pétursdóttur, framkvæmdastjóra Lýsis, er mikið hagræði fólgið í því að koma stærstu tönkunum fyrir í húsinu áður en útveggir og þak eru sett upp. "Þetta gerir það að verkum að menn komast betur að og þetta hentar vel fyrir þá tanka sem eiga að vera innandayra að setja þetta upp um leið og grindin er reist," segir hún. Gert er ráð fyrir að nýja verksmiðja Lýsis verði prufukeyrð í mars en þá tekur nokkurn tíma að fínstilla tækin áður en framleiðsla fer á fullt. Í nýjum höfuðstöðvum Lýsis verður hreinsunarstöð, rannsóknarstofur, skrifstofur og aðstaða til pökkunar á vörunni. Geymslurými nemur þrjú þúsund tonnum. Stóru tankarnir sem komið hefur verið fyrir inni í nýju verksmiðjunni taka áttatíu þúsund tonn en utan dyra verða nokkrir 115 þúsund tonna tankar. "Við finnum að við erum að koma inn á mjög góðum tíma með þessa aukningu. Það hefur verið mikil umfjöllun um ágæti vörunnar og markaðurinn okkar hefur stækkað jafnt og þétt," segir Katrín. Ágæti Omega-3 fitusýru hefur ítrekað verið sannað í rannsóknum og það er á grundvelli þess sem Lýsi hyggur á aukna landvinninga. Um 85 prósent af framleiðslu Lýsis er flutt út og gerir Katrín ráð fyrir að það hlutfall haldi áfram að hækka þótt einnig hafi orðið vart aukinnar eftirspurnar á íslenskum markaði.