Þjóðverjar setja met í lántöku

Stjórnvöld í Þýskalandi ætla að taka jafnvirði 1.200 milljarða íslenskra króna að láni þar sem skatttekjur ríkisins hafa ekki aukist, þrátt fyrir aukinn hagvöxt í Þýskalandi. Lánið kemur til viðbótar við 3.500 milljarða króna sem þegar höfðu verið teknir að láni á þessu ári. Hefur þýska ríkið aldrei tekið jafn há lán á einu ári, andvirði 4.700 milljarða króna, en áætlanir höfðu gert ráð fyrir að lántakan á þessu ári næmi 2.400 milljörðum króna. Fjármálaráðherra Þýskalands, Hans Eichel, sagði lántöku nauðsynlega þar sem hagvöxtur hefði enn ekki náð að auka skatttekjur ríkisins eða lækka atvinnuleysistölur. Sagði Eichel að niðurskurður ríkisútgjalda væri ekki inni í myndinni. Allt stefnir í að Þýskaland verði brotlegt við reglur Myntbandalags Evrópu um fjármálastjórn þriðja árið í röð, því fjárlagahallinn stefnir í að verða 3,7 prósent á þessu ári. Samkvæmt þeim reglum verða evruríkin að halda fjárlagahalla sínum innan við þrjú prósent.