OPEC eykur framleiðslu

Samtök olíuframleiðsluríkja ákváðu á fundi í gær að auka framleiðslu um eina milljón tunna á dag. Helstu olíuríki heims eiga aðild að samtökunum en á þeim vettvangi hafa ríkin samráð um hvernig haga skuli framleiðslu sinni. Olíuverð hækkaði á markaði þrátt fyrir ákvörðun OPEC. Tunnan hækkaði um meira en eitt prósent. Ástæður hækkunarinnar eru taldar vera annars vegar framleiðslutruflanir í Norður-Ameríku af völdum fellibylsins Ívans. Hins vegar olli ákvörðun OPEC vonbrigðum þar sem talið var að auka þyrfti framleiðsluna mun meira til þess að verð á heimsmarkaði lækkaði. Talsmenn OPEC segja að eftirspurn í Kína og Bandaríkjunum valdi háu verði. Samvæmt nýju samkomulagi OPEC munu aðildarríkin framleiða 27 milljónir tunna á dag. Yfirlýst markmið OPEC er að olíuverð sé á bilinu 22 til 28 dalir á tunnu. Til greina kemur að hækka verðmarkmið OPEC á næsta fundi sem verður í desember.