Ég er alheimsborgari

Mike Pollock, fyrrverandi Utangarðsmaður, gaf út tvær breiðskífur á dögunum. Sólóplötuna World Citizen og svo Apocalypse Revue ásamt hljómsveit sinni The Viking Hillbilly. Plötunum er einnig dreift í nokkrum fylkjum Bandaríkjanna og báðar plötur fengu á dögunum glimrandi góða dóma í dagblaðinu The Courier sem gaf sólóplötu Mikes fjórar stjörnur en plötu sveitarinnar þrjár og hálfa. "Í þessum hópi er mikill kærleikur," segir Mike um hópinn sem mannar The Viking Hillbilly og gefur út plöturnar. "Þegar ég hitti fyrst Ronny árið 1998 og horfði í augu hans hugsaði ég með mér; "hvar hefur þú verið, bróðir?" Við þekktum hvor annan eins og skot. Áttum svo margt sameiginlegt, eins og afmælisdag." Ronny heitir réttu nafni Ron Whitehead og er afkastamikið skáld í Kentucky. Honum kynntist Mike í Central Park í New York árið 1997 á minningarathöfn um skáldið Allen Ginsberg. Platan Viking Hillbilly kemur á óvart. Hún er blanda af ljóðaupplestri, söng, teknó, blús og rokki. Það er síðan skemmtileg staðreynd að Mike vottar Megasi virðingu sína með því að flytja eitt laga hans, Lóa Lóa Lóa, á ensku. Sólóplata Mikes er svo með öðru sniði en hún varð til eftir að Mike lét undan þrýstingi sinna nánustu um að gera sólóplötu í tilefni af fimmtugsafmæli sínu. Viðbrögðin hafa orðið til þess að Mike er byrjaður á annarri sólóplötu sem verður að mestu órafmögnuð. Titill plötunnar gefur þær vísbendingar að Mike sé ekki mikið fyrir þjóðrembu. Einnig er ríkur friðarboðskapur svífandi yfir lögunum. "Það eina sem ég get gert til þess að koma á heimsfriði er að finna friðinn inni í sjálfum mér. Vonandi smita ég út frá mér. Ég er hálfur Bandaríkjamaður og hálfur Íslendingur. Ég var mikið á flakki á uppvaxtarárunum og lenti í tilvistarkreppu. Bandarísku krakkarnir kölluðu mig "íslenska strákinn" en þegar ég var hér var ég "Kaninn". Ég komst að því í restina að ég hlyti að vera alheimsborgari." Um þjóðarstolt hefur Mike þetta að segja; "Ég keypti það aldrei. Ég held að það sé óhollt. Það er gott að vera stoltur af sjálfum sér og fjölskyldu en það er líka til óhollt stolt sem loðir við egóisma og þjóðernishyggju. Þetta er afskaplega lítill heimur. Jörðin er eitt stórt þorp í mínum augum. Við erum öll tengd eins og laufblöð á tré. Hvort sem það er George Bush eða Mahatma Gandhi."