Metal-hátíð á þjóðhátíðardaginn

Það er ekki nóg með það að þjóðin fagni 60 ára afmæli lýðveldisins á Þjóðhátíðardaginn 17. júní með hátíðarhöldum í bænum heldur verður unnendum harðkjarnarokks gefin sérstök ástæða til þess að fagna. Í gamla Sjónvarpshúsinu við Laugaveg verður nefnilega haldin stærsta metalhátíð sem haldin hefur verið á Íslandi, til þessa. Hátíðin verður opin öllum aldurshópum og ber yfirskriftina Masters of the Universe. Þar koma fram fjórar erlendar sveitir auk rjómans af íslensku senunni. Bandaríska sveitin Shai Hulud þykir sérstaklega ástríðufull og einlæg og laus við alla tilgerð. Nýjasta plata þeirra, That Within Blood Ill-Tempered, og frumburðurinn, Hearts Once Nourished With Hope & Compassion, frá 1997 þykja sönnun þess. Bandaríska sveitin Give up the Ghost er íslenskum metal-hundum vel kunn enda komu þeir hingað á dögunum og héldu ógleymanlega tónleika. Danska sveitin Urkraft hafa verið kallaðir fánaberar metalsins í Danmörku og hefur á stuttum tíma vakið á sér mikla athygli. Síðast gaf hún út plötuna Eternal Cosmic Slaughter sem fékk góða dóma víðsvegar um heim. Sveitin spilar melódískt dauðarokk í anda At the Gates og The Haunted. Emo-rokksveitin 27 stingur mest í stúf á hátíðinni. Tónlist sveitarinnar er lýst sem dreymandi, ambient rokki sem er undir léttum djassáhrifum. Sveitin hefur gefið út tvær breiðskífur, Songs from the Edge of the Wing (1999) og Animal Life (2002) sem báðar fengu lofsamlega dóma gagnrýnenda í Bandaríkjunum. Íslensku sveitirnar sem spila á hátíðinni verða I Adapt, Changer, Drep. Fighting Shit og Afsprengi Satans. Fjörið hefst kl. 17 í gamla Sjónvarpshúsinu, inngangseyrir verður 1800 kr og ekkert aldurstakmark verður.