Kaupin á FIH endanlega frágengin

KB banki eignast danska bankann FIH í dag. Þar með eru orðin að veruleika stærstu fyrirtækjakaup Íslendinga frá upphafi. Sigurður Einarsson og hans fólk greiða 84 milljarða í dag og fá í staðinn afhent öll hlutabréf í danska bankanum. Seljandi er sænskur banki, Förenings Sparbanken. "Kaupin gjörbreyta bankanum eina ferðina enn," segir Sigurður Einarsson, stjórnarformaður KB banka. Hann segir að auk tvöföldunar á stærð KB banka verði Danmörk stærsta einstaka markaðssvæði bankans. "Þetta færir okkur einu skrefi nær því markmiði okkar að verða alvöru norrænn banki." KB banki aflaði 40 milljarða með hlutafjárútboði til kaupanna en greiðir afganginn með víkjandi lánum og eigin fé. Bankinn hefur auk þess gert samning við Deutche Bank um sölutryggingu 40 milljarða hlutafjár til viðbótar. Hlutafjár sem nýta má til frekari vaxtar. "Það er ljóst að þetta er engin endastöð en við förum varlega og tökum eitt skref í einu." KB banki hefur verið áberandi í stórum fyrirtækjaverkefnum og væntingar eru um að bankinn nýti viðskiptamannahóp FIH til slíkra verkefna sem jafnan gefa vel af sér. Sigurður segir að menn fari sér hægt í þeim efnum. "Við munum vinna í takti við núverandi stjórnendur bankans." Hann segir að ekki verði aðrar breytingar á stjórn bankans en þær að hann og Hreiðar Már Sigurðsson, forstjóri KB banka, komi inn í stjórnina. "Það rímar við stefnu okkar að vera heimabanki á hverjum stað. Danskur banki í Danmörku og sænskur í Svíþjóð." Sigurður segir að hagræðið komi svo með stærri einingu sem birtist í betri kjörum í fjármögnun starfseminnar. Eftir sameiningu verða eignir KB banka á bilinu 1.500 til 1.700 milljarðar íslenskra króna. Greiningardeild Íslandsbanka birti fyrir skemmstu verðmat á bankanum. Þar er gert ráð fyrir að hagnaður sameinaðs banka verði yfir átján milljarðar króna í ár.