Ræðir um afturhvarf til fortíðar

Þór Sigfússon, framkvæmdastjóri Verslunarráðs Íslands, hefur áhyggjur af því að tilhneigingar gæti til þess að auka hlut ríkisins á meðan þróunin í nágrannalöndunum sé þveröfug. Á fundi Íslandsbanka um viðskiptahorfur næsta árs er Þór meðal frummælenda og hefur erindi hans yfirskriftina "Afturhvarf til fortíðar." Þar fjallar hann um aukin umsvif ríkisvaldsins og setur það í samhengi við aukna umfjöllun um græðgi og óhóf í viðskiptalífinu. Við erum að horfa upp á vissa ríkisvæðingu. Ríkisstofnunum hefur ekki fækkað og það er verið að tala jafnvel um fjölgun þeirra núna. Það hafa komið úr ýmsum áttum hugmyndir um nýja lyfjaverslun ríkisins. Það er að sumu leyti afturhvarf til fortíðar. Það er trú á því að ríkið geti leyst einhver mál umfram það sem markaðurinn hefur gert," segir Þór. Hann segir að þetta gerist á sama tíma og neikvæð umfjöllun um viðskiptalífið hafi aukist. "Á sama tíma virðist sem áhugi fyrir einkavæðingu sé á niðurleið. Þetta gerist þegar þjóðirnar í kringum okkur eru að setja mikinn kraft í einkavæðingu," segir Þór. Hann nefnir sem dæmi að nú séu uppi háværar raddir í Danmörku sem fari fram á aukna einkavæðingu í heilbrigðis- og menntageiranum. "Hjá okkur er alltaf eins og þetta séu einhverjir sértrúarhópar í Verslunarráðinu eða Heimdalli sem tala svona," á meðan annars staðar sé þessi umræða mun almennari.