Glazer eykur enn hlut sinn

Bandaríski kaupsýslumaðurinn Malcolm Glazer jók hlut sinn í fótboltafélaginu Manchester United þriðja daginn í röð. Hann á nú 28,11 prósenta hlut í félaginu og hefur aukið hlut sinn um 72 prósent. Síðan á föstudag hefur hann keypt hlutabréf fyrir um 720 milljónir króna í félaginu. Bresk lög gera ráð fyrir því að hver sá sem eignist 30 prósenta hlut í félagi verði að gera öðrum hluthöfum tilboð um yfirtöku á hlut þeirra. Aðdáendur Manchester United eru andsnúnir því að Glazer eignist félagið og hafa haft frammi mótmæli og hótað Glazer ofbeldi verði af kaupunum. Þeir halda því fram að Glazer ætli sér aðeins að hagnast á kaupunum, meðal annars með því að hækka miðaverð, og að hann muni ekki hafa hagsmuni liðsins að leiðarljósi. Aðdáendur áttu þátt í að koma í veg fyrir kaup fjölmiðlarisans Rupert Murdoch á félaginu árið 1999.