Sjálfstæðisyfirlýsing The Flavors

Léttirinn fyrir Sigurjón Brink, söngvara og lagasmið The Flavors, hlýtur að vera mikill. Hann hefur gengið með plötu í maganum frá því að sveitin In Bloom hætti. Þar trommaði Sjonni en í honum blundaði lagahöfundur. Það tók hann tvö ár að finna kjark til þess að hafa trú á sínu eigin efni og svo hálft annað ár að hlaða nýju sveitinni utan um sig og vinna nýju plötuna. The Flavors náði laginu Here í spilun fyrir áramót og þessa dagana leikur Bylgjan titillag nýju plötunnar, Go Your Own Way, ótt og títt. Frumraunin kemur svo í búðir á morgun. "Þetta er svona kántríslagari," segir Sjonni um nýja lagið. "Ef maður ætti að lýsa þessu lagi á einhvern hátt þá er best að tala um melódískt kántrískotið pönkrokk. Þetta er í léttari kantinum." Sjonni rekur eigið hljóðver, Iceland Music Productions, ásamt félögum sínum og hefur þannig haft rými til þess að nostra við frumraunina áður en henni var sleppt út til almennings. "Við erum búnir að svitna og grenja yfir þessu," segir Sjonni. "Það hafa orðið mannabreytingar á sveitinni á þessum tíma og nú er loksins komin rétt mynd á þetta. Við þurftum svo að taka upp hluta af þessu aftur en á sama tíma vildum við ekki ofvinna lögin." The Flavors gefa sjálfir út en Skífan dreifir. Þeir hljóðrita einnig lög sín sjálfir og starfa þannig algjörlega sjálfstæðir. "Á þessum tíma sem maður hefur verið að vinna þetta þá erum við búnir að gera efni í tvær plötur til viðbótar, þannig séð. Nokkrum dögum áður en hún fór í framleiðslu ákváðum við að breyta henni aðeins og setja tvö lög til viðbótar á hana. Annað þeirra var lagið sem nú er í spilun," upplýsir Sjonni að lokum. Með þetta sjálfstæði að leiðarljósi er ekki út í hött að álykta að titill plötunnar, og nýja slagarans, sé einmitt sjálfstæðisyfirlýsing sveitarinnar sem fer greinilega sínar eigin leiðir. Sveitin heldur svo útgáfutónleika í Loftkastalanum annað kvöld.