Hlutverk landsliðsmannana á Eurobasket í Berlín

Tólf íslenskir körfuboltaleikmenn endurskrifa íslensku körfuboltasöguna í Berlín á laugardaginn þegar Ísland spilar sinn fyrsta leik á stórmóti í körfubolta. Mótherjarnir eru heimamenn í Þýskalandi og leikurinn er ekki bara fyrsti leikur Íslands heldur einnig opunarleikur B-riðilsins Evrópumótsins sem er allur spilaður í Berlín.

Það efast fáir um mikilvægi landsliðsfyrirliðans Hlyns Bæringssonar og enginn er reynslumeiri á stóra sviðinu en stórstjarna liðsins Jón Arnór Stefánsson.

Þeir gera þetta þó ekki einir og treysta á góða hjálp frá öðrum leikmönnum íslenska liðsins. Fréttablaðið skoðaði nánar íslenska leikmannahópinn og setti sig inn í það hvaða hlutverkum strákarnir eiga skila í þessum fimm leikjum á sex dögum í Mercedes-Benz höllinni í Berlín.



„Hjarta liðsins“

Hlynur Bæringsson

33 ára og 200 sm miðherji

90 landsleikir fyrir Ísland

928 stig fyrir Ísland

32 Evrópulandsleikir

Mikilvægasti leikmaður íslenska liðsins stendur vaktina fyrir framan körfuna á móti þungum og risastórum stjörnuleikmönnum mótherjanna. Hreysti og hugarfar Hlyns er engu líkt og menn þurfa vissulega mjög marga sentimetra og mörg kíló á hann til að koma landsliðsfyrirliðanum úr jafnvægi inn í teig.

Hlynur er ómissandi í vörninni en hann er líka gríðarlega mikilvægur í sóknarleiknum þar sem hann dregur meðal annars stóru menn mótherjanna frá körfunni með þriggja stiga skotum sínum. Hlynur er einnig öflugur sendingamaður og fáir betri í að halda sóknum á lífi með því að taka hvert sóknarfrákastið á fætur öðru

„Stórstjarnan“

Jón Arnór Stefánsson

33 ára og 196 sm bakvörður

77 landsleikir fyrir Ísland

1030 stig fyrir Ísland

40 Evrópulandsleikir

Jón Arnór Stefánsson er besti körfuboltamaður landsliðsins og hefur verið það í meira en áratug. Hann er leiðtogi íslenska liðsins og það kemur aldrei betur í ljós en þegar liðið er komið á stóra sviðið. Jón Arnór hefur spilað í bestu deildum Evrópu síðustu árin og reynsla hans verður ómetanleg á EM.

Liðið mun leita til hans á erfiðum tímapunktum á Evrópumótinu og heilsa og orka hans mun spila stóra rullu í gengi liðsins. Jón Arnór er fyrst og fremst góður liðsmaður og frábær varnarmaður með sínunm félagsliðum í Evrópuboltanum en þegar hann er kominn í landsliðsbúninginn þá veit hann að liðið treystir á hann að taka af skarið.

„Lykilmaðurinn“

Haukur Helgi Pálsson

23 ára og 198 sm framherji

35 landsleikir fyrir Ísland

393 stig fyrir Ísland

18 Evrópulandsleikir

Haukur Helgi er algjör lykilmaður í íslenska liðinu hvort sem litið er á varnarleikinn eða sóknarleikinn. Haukur hefur bætt líkamlegan styrk í sumar og er að mestu búinn að vera laus við villuvandræði í undirbúningnum sem eru góðar fréttir enda hafa villuvandræði verið daglegt brauð hjá honum síðustu ár.

Haukur þarf að dekka stóra og hreyfanlega leikmenn og gerir það oftast vel. Íslenska liðið tapar sjaldan þegar Haukur er að spila vel sem er gott dæmi um mikilvægi kappans. Haukur er frábær hraðaupphlaupsmaður, keyrir manna best á körfuna og hefur bætt skotið sitt fyrir utan.

„Rússinn okkar“

Pavel Ermolinskij

28 ára og 202 sm bakvörður

50 landsleikir fyrir Ísland

306 stig fyrir Ísland

20 Evrópulandsleikir

Pavel er af rússneskum ættum og það fer ekkert á milli mála þegar kemur að leik hans. Ískaldur að taka skotin á mikilvægum tímapunktum, góður undir pressu og virðist hreinlega aldrei fara á taugum.

Pavel leitar uppi félaga sína og er aldrei betri en þegar leikmenn liðsins eru að hitta vel í kringum hann. Pavel er líklega eini leikmaður íslenska liðsins sem mun lenda reglulega í því á EM að vera dekkaður af lávaxnari leikmanni.

„Orkuboltinn“

Hörður Axel Vilhjálmsson

26 ára og 194 sm bakvörður

43 landsleikir fyrir Ísland

241 stig fyrir Ísland

12 Evrópulandsleikir

Hörður Axel þekkir bara einn gír og hann verður í túrbó-gírnum allar mínútur hans á gólfinu í Berlín.

Hörður er frábær varnarmaður sem gefur bestu bakvörðum mótherjanna engin grið og gefur um leið tóninn í agressívum varnarleik íslenska liðsins.

Hörður Axel hefur verið að ná meiri stöðuleika í sókninni en skotið hafði oft týnst á undanförnum árum. Nú setur hann hinsvegar þristana reglulega niður.

„Vonarstjarnan“

Martin Hermannsson

20 ára og 193 sm bakvörður

30 landsleikir fyrir Ísland

161 stig fyrir Ísland

8 Evrópulandsleikir

Martin er yngsti leikmaður íslenska liðsins og þótt að hann sé ekki mikið yngri en Haukur þá munu reynsla hans á EM nýtast honum vel í næstu stóru kynslóðarskiptum innan íslenska liðsins.

Martin er úrræðagóður sóknarmaður og kemur með nýjar víddir inn í sóknina þegar hann kemur inn af bekknum.

Getur hreinlega tekið yfir leiki þegar hann kemst í stuð eins og við sáum meðal annars í sigrinum mikilvæga á móti Bretum í Laugardalshöllinni.

Getur klárað í kringum körfuna og flot-skotin hans eru jafnan fyrsta flokks.

„Stóri strákurinn“

Ragnar Nathanaelsson

24 ára og 218 sm miðherji

30 landsleikir fyrir Ísland

71 stig fyrir Ísland

8 Evrópulandsleikir

Ragnar er langstærsti leikmaður íslenska liðsins, sextán sentimetrum hærri en sá næsthæsti sem er Pavel.

Ragnar er ekki bara hávaxinn því hann er líka risastór karakter innan hópsins sem skemmtir sér og liðsfélögunum með léttleika og ljúfmennsku.

Landsliðsþjálfararnir hafa lítið notað hann í undirbúningnum en nú er von á því að íslenska liðið mæti fleiri leikmönnum af hans stærð á EM.

„Sá skynsami“

Jakob Örn Sigurðarson

33 ára og 190 sm bakvörður

80 landsleikir fyrir Ísland

877 stig fyrir Ísland

29 Evrópulandsleikir

Jakob er kominn aftur inn í liðið eftir ársfrí og hefur þegar fengið mikilvægt hlutverk þótt að hann verði líklega ekki í byrjunarliðinu á EM.

Jakob mun koma með yfirvegun og skynsemi inn af bekknum sem getur dottið í stuð eins og fleiri leikmenn í bakvarðarsveit íslenska liðsins.

Jakob hefur verið einn allra traustasti leikmaður íslenska liðsins undanfarin ár og reynsla hans mun nýtast vel á mótinu.

Hann er mjög góð skytta og mjög öruggur með boltann. Fáir eru skynsamari með boltann.

„Skyttan“

Logi Gunnarsson

33 ára og 190 sm bakvörður

116 landsleikir fyrir Ísland

1300 stig fyrir Ísland

46 Evrópulandsleikir

Leikjahæstur í hópnum og sá sem hefur skorað flest stig fyrir íslenska landsliðið á þessari öld.

Logi er frábær skotmaður sem má ekki fá opið skot innan sem utan þriggja stiga línuna.

Logi hefur oftar en ekki fundið miðið í landsleikjum og þá fara hin ótrúlegustu skot rétta leið.

Logi hefur mikla reynslu af því að koma inn til að breyta leikjum en framfarir hans í varnarleiknum eiga líka mikið hrós skilið.

Það er hægt að treysta því að Logi mæti óhræddur inn á gólfið, með einbeitingu í vörninni og tilbúinn að taka fyrsta opna skotið.

„Svissneski hnífurinn“

Helgi Már Magnússon

33 ára og 197 sm framherji

90 landsleikir fyrir Ísland

506 stig fyrir Ísland

33 Evrópulandsleikir

Helgi Már hjálpar íslenska liðinu mikið með fjölhæfni sinni í vörn og sókn. Hann er fín skytta, heilt yfir úrræðagóður í sókninni og í vörninni getur hann hjálpað til á mörgum stöðum.

Frábær liðsmaður sem flestum þykir mjög gott að spila með enda maður sem fórnar sínum leik fyrir liðið. Klókindi hans í vörninni koma sóknarmönnum mótherjanna oft í opna skjöldu og þá les hann einnig mjög vel hvar færin leynast í sóknarleiknum, bæði inn í teig og fyrir utan.

„Bóndinn“

Axel Kárason

32 ára og 192 sm framherji

44 landsleikir fyrir Ísland

44 stig fyrir Ísland

18 Evrópulandsleikir

Axel hefur verið hluti af liðinu í langan tíma og er jafnan að skila hlutverki tólfta mannsins með glans. Frábær liðsmaður og fínasta þriggja stiga skytta. Axel spilar ekki mikið en hann getur leyst mörg vandamál sem koma upp og þá einkum í vörninni.

Líkt gengur og gerist hjá íslenska bóndanum þá gengur Axel í öll verk og gerir það af dug og áhuga. Er líka stundum kallaður litli Hlynur meðal góðra manna enda sá sem kemur örugglega til með að leysa af landsliðsfyrirliðann í Berlín.

„Varamótorinn“

Ægir Þór Steinarsson

24 ára og 182 sm bakvörður

27 landsleikir fyrir Ísland

121 stig fyrir Ísland

10 Evrópulandsleikir

Ægir Þór er langminnsti leikmaður íslenska liðsins og er því í hættu að lenda ítrekað í því að dekka miklu hærri leikmenn. Eitt er víst að Ægir gefur allt sitt í þær mínútur sem hann spilar, hann er mótorleikmaður sem mun koma með jákvæða orku inn í varnarleik íslenska liðsins þær mínútur sem hann spilar.

Það er hinsvegar nóg af bakvörðum í íslenska liðinu og því mun Ægir eflaust ekki spila mikið á EM. Mikilvægi hans sem góðs og jákvæðs liðsmanns telur því líka fyrir hópinn.