Unnustinn réðst á Solo degi fyrir brúðkaupið

Samband Hope Solo, markvarðar bandaríska landsliðsins, og Jerramy Stevens, fyrrum leikmanns Seattle í NFL-deildinni, virðist vera skrautlegt því leikmaðurinn var handtekinn fyrir að leggja hendur á Solo aðeins degi fyrir áætlaðan brúðkaupsdag þeirra.

Þau hafa aðeins verið í sambandi í tvo mánuði en ákváðu samt að gifta sig og sóttu um giftingarleyfi í síðustu viku.

Þau héldu aftur á móti skrautlegt teiti á mánudag þar sem þau virðast hafa slegist sem og aðrir í teitinu. Stevens þóttist vera sofandi er lögreglan kom en var handtekinn þar sem hann var með blóð á bolnum og Solo var með skurð á olnboga.

Fleiri voru handteknir í teitinu þar sem einn gesta hafði notað rafmagnsbyssu til að róa mannskapinn niður.

Brúðkaupsdagurinn fór í réttarhöld og er ekki vitað hvort þau séu búin að gifta sig. Solo reyndi að verja sinn mann í réttarhöldunum og öskraði á bróður sinn að segja ekki frá neinu áður en hann fór inn í réttarsalinn.

Stevens gengur laus og saksóknaraembættið hefur ekki tekið ákvörðun um hvort það muni kæra í málinu.