Ók á móti umferð í nýju hringtorgi
Það mun taka ökumenn nokkurn tíma að venjast nýju hringtorgi við Biskupstungnabraut á Selfossi ef marka má uppákomu á torginu í dag. Ökumaður fólksbíls ók út úr hringtorginu gegn umferð og mætti þar stærðarinnar vörubíl. Nokkur bílaröð myndaðist en vörubílstjórinn var fljótur að bjarga málum. Hann vippaði sér úr vörubílnum og bakkaði fólksbílnum aftur inn á hringtorgið fyrir bílstjórann áttavillta sem gat haldið áfram ferð sinni.
