Guðjón Þórðar um Gylfa: Fer í eitt af stóru liðunum

Gylfi Þór Sigurðsson virðist hafa verið síðasta púslið í hið stórskemmtilega og vel spilandi Swansea-lið sem er komið upp í áttunda sæti ensku úrvalsdeildarinnar eftir 3-0 útisigur á Fulham um helgina. Gylfi Þór átti þarna enn einn stórleikinn og skoraði tvö mörk í annað skiptið á tveimur vikum.

„Ég hef skorað fimm mörk í átta byrjunarliðsleikjum í deildinni sem er kannski meira en ég bjóst við fyrir fram. Ég nýt þess að spila með frábæru liði. Það er ekki erfitt að skora þegar þú færð svona þjónustu eins og ég fékk í þessum mörkum," sagði Gylfi lítillátur í viðtali á heimasíðu Swansea City.

Fréttablaðið leitaði til Guðjóns Þórðarsonar, núverandi þjálfara Grindavíkur, til að fá hans skoðun á því af hverju Gylfi passar svona vel inn í enska boltann. Það var einmitt Guðjón sem gaf Gylfa fyrsta alvöru tækifærið í enska boltanum þegar hann fékk hann á láni frá Reading í febrúar 2009. Gylfi var þá aðeins 19 ára gamall.

„Hann sýndi strax af sér djörfung og dug hjá mér. Hann er ofboðslega vinnusamur, samviskusamur og góður atvinnumaður," sagði Guðjón um Gylfa.

„Það var vitað mál að þessi strákur væri að fara langt en þetta var bara spurning um hversu langt hann færi. Þegar ég var að reyna að segja mönnum hér heima á Íslandi hvað hæfileikar byggju í þessum strák þá vildu nú ekki allir hlusta. Menn sem voru að velja úrvalsliðin okkar á Íslandi töldu sig ekki hafa þörf fyrir hann," segir Guðjón en af hverju finnur Gylfi sig betur í enska boltanum en í þeim þýska?

„Það er meiri ástríða í fótboltanum í Englandi heldur en í Þýskalandi. Hann er búinn að vera lengi í Englandi og þekkir og skynjar andann," segir Guðjón. Guðjón segir Gylfa hafa alltaf verið tilbúinn að leita leiða til að bæta sinn leik þegar hann var hjá Crewe.

„Gylfi er fyrst og fremst ofboðslega vinnusamur. Hann tók alltaf með DVD-klippurnar og DVD af leikjunum og skoðaði þær. Hann hugsar um fótboltann daginn út og daginn inn, Hann var líka alltaf tilbúinn að spyrja til að leita leiða og lausna þótt hann væri bara pjakkur þegar ég tók við honum," rifjar Guðjón upp.

En hvar skapar Gylfi sér sérstöðu inni á vellinum að mati Guðjóns. „Það er þessi sýn sem hann hefur. Sýn hans á leikinn er breiðari og magnaðri en hjá mörgum kollegum hans," segir Guðjón og hann spáir því að Gylfi fari til eitt af stóru liðunum á Englandi í sumar.

„Ég á von á því að eitt af stóru liðunum á Bretlandi taki hann og gefi honum raunverulegt tækifæri," segir Guðjón að lokum.

Gylfi fékk mikið hrós í umfjöllun enskra fjölmiðla um leikinn og einn af þeim sem völdu hann mann leiksins var Patrick Barcklay blaðamaður á The Independent. „Sá renglulegi öðlast glæsileika þegar hann fær boltann og hann hefur alltaf nóg af hugmyndum og eldmóði í sínum leik. Nú er Sigurðsson líka farinn að skora mörk," skrifaði Barcklay í umfjöllun sinn.

Það verður spennandi að fylgjast með Gylfa og Swansea-liðinu á næstunni og einhverjir eru örugglega farnir að telja niður þar til liðið spilar næst sem er á móti Everton á laugardaginn kemur.