Bensín­verð hækkar aftur á morgun

Virðisaukaskattur á bensín og dísil var í maí lækkaður úr 24 prósentum í 11 prósent út sumarið eða til 31. ágúst samkvæmt tímabundinni heimild sem gefin var í lögum sem samþykkt voru á Alþingi í maí. Aðgerðin var hluti aðgerðapakka sem ríkisstjórnin tilkynnti um apríl gegn verðbólgu.

Samkeppniseftirlitinu var í kjölfarið falið að fylgjast með því að lækkunin skilaði sér að fullu til neytenda. Í umræðuskjali Samkeppniseftirlitsins, sem gefið var út í byrjun júlí, kom fram að ekki væri hægt að fullyrða að virðisaukaskattslækkun eldsneytis hefði í öllum tilvikum skilað sér að fullu í endanlegu útsöluverði. Þar kom einnig fram að ýmsum spurningum væri enn ósvarað. Einhver olíufélög hafi hækkað verðið dagana fyrir gildistöku skattalækkunarinnar.

Á síðunni gasvaktin.is, sem sækir verð á eldsneyti hjá flestum olíufélögum, mátti eftir virðisaukaskattslækkunina sjá að verð hefði lækkað eftir virðisaukaskattsbreytinguna um 26 til 27 krónur lítrinn á bensíni og dísil um 30 til 32 krónur.

Þá var ódýrasti lítrinn af bensíni hjá Costco þar sem hann kostaði 198,3 krónur en þar þarf meðlimakort til að kaupa bensín. Á almennum bensínstöðvum var ódýrasti lítrinn hjá Orkunni þar sem hann kostar 202,3 krónur. Hjá Atlantsolíu var hann á 202,4 krónur.

Í dag er lítrinn, samkvæmt sömu síðu, hjá Costco á 191,1 krónu og á 201 krónu hjá Orkunni. Hjá Atlantsolíu er lítrinn á 201,2 krónur og 201,3 hjá ÓB. Hjá N1 er lítrinn víða á 202 krónur en svo er verðið annað ef skoðað er á landsbyggðinni. Til dæmis er lítrinn á 216 krónur hjá Orkunni í Stykkishólmi og 225,3 hjá ÓB á Ísafirði.

Lítrinn af dísil er ódýrastur hjá Costco á 224,3 krónur og svo á 234,3 krónur hjá Orkunni og 234,4 hjá Atlantsolíu.