Hækka stýrivexti

Þetta segir í yfirlýsingu nefndarinnar, sem gefin var út klukkan 08:30. Þar segir að verðbólga hafi verið yfir 5 prósent það sem af er ári og mælst 5,3 prósent í júlí. Samkvæmt nýbirtri spá Seðlabankans sé talið að hún aukist enn frekar á næstu mánuðum en hjaðni tiltölulega hratt þegar kemur fram á næsta ár. 

Aukning mældrar verðbólgu hafi fyrst og fremst litast af hækkun opinberra gjalda og áhrifum stríðsátaka í Mið-Austurlöndum. Undirliggjandi verðbólga hafi haldist stöðug og sé tekin að hjaðna á suma mælikvarða í takt við vaxandi slaka í þjóðarbúinu. Annarrar umferðar áhrif þessara verðhækkana virðast því enn sem komið er vera minni en upphaflega var óttast. Þá hafi verðbólguálag á markaði einnig lækkað á ný eftir hækkun í vor.

Óvissan áfram mikil

„Verðbólguvæntingar eru þó enn of háar og undirliggjandi verðbólga of mikil. Þó búist sé við að verðbólga hjaðni hratt á næsta ári er óvissa áfram mikil ekki síst hvað varðar þróun alþjóðlegra efnahagsmála og framvindu á innlendum vinnumarkaði.“

Í ljósi mikillar verðbólgu og hárra verðbólguvæntinga telji peningastefnunefnd rétt að hækka vexti bankans til að tryggja nægjanlegt peningalegt aðhald. Mótun peningastefnunnar muni þó sem fyrr ráðast af þróun efnahagsumsvifa, verðbólgu og verðbólguvæntinga.

Greiningaraðilar sannspáir

Flestir greiningaraðilar höfðu spáð því að stýrivextir yrðu hækkaðir. Stóru viðskiptabankarnir þrír spáðu allir 0,25 prósenta hækkun. 

Þau Ásgeir Jónsson, seðlabankastjóri, Þórarinn G. Pétursson, varaseðlabankastjóri peningastefnu og Karen Áslaug Vignisdóttir, aðalhagfræðingur Seðlabankans og framkvæmdastjóri sviðs hagfræði og peningastefnu, kynna ákvörðun peningastefnunefndar og nýútgefin Peningamál á blaðamannafundi klukkan 09:30. 

Fundinn má sjá í beinni útsendingu í spilaranum hér að neðan: