Gætu rekið ís­lenska ríkis­sjóðinn fyrir kaup­verðið á Lakers

Kaupverðið að þessu sinni er 12,5 milljarðar Bandaríkjadala eða um 1544 milljarðar íslenskra króna sem er það langmesta sem einhver hefur fengið fyrir íþróttafélag í Bandaríkjunum.

Þetta er líka það stór upphæð að það er erfitt að setja hana í samhengi við eitthvað sem almenningur áttar sig á en það væri þó hægt að bera hana saman við ríkissjóð Íslands.

Rekstur ríkissjóðs Íslands felur í sér stjórn á opinberum fjármálum, innheimtu skatta og úthlutun fjárheimilda samkvæmt fjárlögum, en árið 2026 er gert ráð fyrir að heildartekjur ríkisins verði um 1.591 milljarður króna. Við Íslendingar gætum því næstum því rekið íslenska ríkissjóðinn fyrir kaupverðið á Lakers.

Kaupendurnir eru fyrrverandi forstjóri Disney, Bob Iger, og áhættufjárfestirinn Josh Kushner en sá síðastnefndi er yngri bróðir Jared Kushner sem er eiginmaður Ivönku Trump og hann er því tengdasonur Donalds Trump Bandaríkjaforseta.

Mark Walter hafði keypt meirihlutaeign í Lakers af Buss-fjölskyldunni á síðasta ári fyrir þáverandi metverðmat á liðinu upp á um tíu milljarða dala. Hann hagnaðist því um tvo milljarða dala eða 247 milljarða á þessum stutta tíma.

„Sem ævilangir NBA-aðdáendur erum við afar stoltir af því tækifæri að verða ráðsmenn Los Angeles Lakers, eins þekktasta íþróttafélags í heimi. Við berum mikla virðingu fyrir forystu og framtíðarsýn Jerry og Jeanie Buss. Langtímaskuldbinding okkar er að byggja á þeim grunni, keppa á hæsta stigi og þjóna þessu ótrúlega liði, aðdáendum þess og borginni Los Angeles,“ sögðu Kushner og Iger í yfirlýsingu.

Walter, forstjóri og stjórnarformaður fjárfestingafélagsins TWG Global, hefur verið meirihlutaeigandi Lakers síðan í október síðastliðnum þegar tilboð hans var samþykkt einróma af NBA.

„Að eiga Los Angeles Lakers hefur verið einn mesti heiður lífs míns – ótrúleg fjárfesting, en það sem ég mun búa að er samfélagið, aðdáendurnir og borgin sem kemur fram við þetta lið sem fjölskyldu. Ég er þakklátur Jeanie Buss, Buss-fjölskyldunni, leikmönnunum og starfsfólkinu fyrir að bjóða mig velkominn í þennan kafla. Lakers tilheyrir Los Angeles og ég er fullviss um að það besta er enn framundan,“ sagði Walter í yfirlýsingu en enginn hefur örugglega grætt jafnmikið á íþróttafélagi á jafnstuttum tíma og hann.