Ás­laug Arna í gervi­greindina hjá Fenris Creations

Þetta segir í fréttatilkynningu frá Fenris Creations.

Áslaug Arna tilkynnti nokkuð óvænt þann 3. júní síðastliðinn að hún hefði ákveðið að láta af þingmennsku. Hún hafði setið á þingi frá árinu 2016 og gengt embætti dómsmálaráðherra, vísinda-, iðnaðar- og nýsköpunarráðherra og háskóla-, iðnaðar- og nýsköpunarráðherra.

Margir hafa velt því fyrir sér hvað tekur við eftir langan feril hennar í pólitík en hún hafði áður tekið sér nokkurra mánaða leyfi til þess að leggja stund á MPA-nám (e. Master in Public Administration in Global Leadership) við Columbia-háskóla í New York.

Nú er komið í ljós að hún hefir ráðið sig til Fenris Creations í starf sem nefnist Senior director AI partnerships á ensku. Það gæti útlagst á íslensku framkvæmdastjóri samstarfs á sviði gervigreindar. 

Prófa hegðun gervigreindarlíkana í sýndarheimum

Í fréttatilkynningu segir að hún leiði nýtt gervigreindarverkefni félagsins og stýri uppbyggingu prófunarvettvangs fyrir gervigreind í EVE Frontier. Þá muni hún leiða samstarf félagsins við rannsóknastofur á sviði gervigreindar, háskóla, stefnumótendur og lykilsamstarfsaðila um nýtt rannsóknarverkefni sem tengist EVE Frontier.

„Fenris Creations hefur unnið að þróun verkefnisins undanfarna mánuði en það byggir á þeirri kenningu að sýndarheimar á borð við EVE Frontier geti orðið kjörinn prófunarvettvangur til að rannsaka hegðun háþróaðra gervigreindarlíkana í flóknu og síbreytilegu umhverfi, áður en þau verða hluti af daglegu lífi okkar. Markmiðið er að prófunarvettvangurinn verði mikilvægt framlag til rannsókna á gervigreind og um leið opna á nýtt hlutverk fyrir Fenris Creations og EVE Frontier.“

Í stað þess að reiða sig eingöngu á skammlífar hermanir sé ætlunin að skapa vettvang þar sem hægt er að fylgjast með sjálfstæðum kerfum við aðstæður sem líkjast raunverulegu hagkerfi sem mest. Þar starfi kerfin innan um raunverulegt fólk og ákvarðanir þeirra hafi raunverulegar afleiðingar í hinu síbreytilega umhverfi EVE heimsins.

EVE heimurinn henti sérlega vel

Þá segir að EVE heimurinn henti sérstaklega vel til slíkra rannsókna. Í meira en tvo áratugi hafi þar þróast lifandi sýndarhagkerfi með viðskiptum, framleiðslukeðjum, gjaldmiðlum, og hrávörumörkuðum, svo ekki sé minnst á bandalög, átök, svik, gróða og tap. Þessi heimur hafi mótast af hundruðum þúsunda raunverulegra þátttakenda með allri þeirri ófyrirsjáanlegu hegðun sem þeim fylgja. Ólíkt mörgum leikjum eigi EVE heimurinn sér ekki upphaf og endi: Mistök standi, skuldir hverfi ekki, sambönd endist og orðspor fylgi þátttakendum. Það geri hann að einum fárra staða þar sem hægt er að rannsaka hegðun sjálfstæðra kerfa við aðstæður sem líkjast raunverulegu hagkerfi og samfélagi.

„Í EVE Frontier, nýjum kafla í EVE heiminum, verður sýndarheimurinn nýttur til að rannsaka hvernig sjálfstæð gervigreindarlíkön setja sér markmið, bregðast við breytingum og taka samhangandi ákvarðanir yfir lengri tíma. Þannig geta rannsakendur lagt nákvæmara mat á hegðun líkana við raunaðstæður og stuðlað að ábyrgri þróun gervigreindarkerfa. Takist verkefnið gæti það orðið mikilvægt framlag til rannsókna á greindum gerendum (e. intelligent agents), flóknum kerfum og aðlögun gervigreindar. Jafnframt gæti það skapað alveg nýtt hlutverk fyrir Fenris Creations og EVE Frontier.“

Það sem geri þessa vinnu mögulega sé umfang og langlífi þess sem þegar hafi verið byggt upp. Fenris leggi til reynslu sína af þróun og rekstri viðvarandi sýndarheima, ásamt þeirri þekkingu á verkfræði, hönnun og samfélagsuppbyggingu sem þurfi til að kanna hegðun sjálfstæðrar gervigreindar. Fáir sýndarheimar bjóði upp á sambærilega blöndu af samfellu, margbreytileika og langtíma þátttöku fólks.

Hvergi annars staðar að finna

Haft er eftir Hilmari Veigari Péturssyni, forstjóra Fenris Creations, að hverri stórri framþróun í gervigreind hafi fylgt þörf fyrir nýjan prófunarvettvang.

„Við teljum að viðvarandi sýndarheimar séu næsta skrefið. EVE Frontier býður upp á nokkuð sem er hvergi annars staðar að finna: Lifandi hagkerfi þar sem greindir gerendur geta lært, unnið saman, keppt og gert mistök sem hafa varanlegar afleiðingar. Við erum afar spennt að bjóða Áslaugu velkomna til Fenris, þar sem hún mun hjálpa okkur að leiða það alþjóðlega samstarf sem þarf til að gera þessa framtíðarsýn að veruleika.“

„Eftir að hafa kynnst af eigin raun hvernig stefnumótun fer fram og henni er hrint í framkvæmd er ég spennt að fá að nýta pólitíska reynslu mína í þessu nýja hlutverki. Fátt býður upp á betra tækifæri til að móta framtíð nýsköpunar í gervigreind en að taka þátt í uppbyggingu prófunarvettvangs sem gerir samstarfsaðilum okkar kleift að ná raunverulegum árangri í samskiptum við eftirlits- og stjórnvöld. Þannig getum við stuðlað að öruggum, hagnýtum og áreiðanlegum stöðlum fyrir gervigreind. Ég hlakka til að hjálpa Fenris að þróa þetta starf áfram með ábyrgum hætti,“ er haft eftir Áslaugu Örnu.

Aftur í eigu Íslendinga

Fenris Creations var stofnað á Íslandi árið 1997 undir heitinu CCP Games. Nafni félagsins var breytt í maí síðastliðnum eftir að stjórnendur þess keyptu fyrirtækið aftur af fyrirtæki frá Suður-Kóreu en það var gert með aðkomu Aldir ehf. Omega ehf. og tæknirisans Google.

Fyrirtækið er nú að mestu í eigu Íslendinga og höfuðstöðvar þess eru í Reykjavík en það rekur einnig starfsstöðvar í London og Shanghai. 

Fréttin hefur verið uppfærð eftir að fréttatilkynning barst.