Antonelli á ráspól en liðsfélagi hans fór í vegginn

Gott gengi Antonelli ætlar engan endi að taka en hann byrjar breska kappaksturinn á morgun á ráspól. Liðsfélagi Antonelli hjá Mercedes, George Russell, var í vandræðum í tímatökunum í dag en hann endaði í veggnum í fyrsta hluta tímatakanna. Hann náði þó að halda áfram og keyrði fjórða hraðasta hringinn í lokahluta tímatakanna.

Charles Leclerc hjá Ferrari hefur ekki átt gott gengi upp á síðkastið en hann náði að laga það í tímatökunum. Hann var með næsthraðasta tímann og var ekki langt frá því að skáka Antonelli. Lewis Hamilton, liðsfélagi Leclerc hjá Ferrari, keyrði hraðast í spretttímatökunum í gær en náði einungis þriðja hraðasta hringnum í tímatökunum fyrir kappaksturinn á morgun.

Max Verstappen mun byrja keppnina á morgun í sjöunda sæti milli Mclaren-ökumannana sem eru í sjötta og áttunda sæti.

Breski kappaksturinn verður sýndur í beinni útsendingu á Sýn sport Viaplay á morgun og byrjar kappaksturinn klukkan tvö.