„Alltaf sami tóm­leiki þegar fjöl­skyldan er ekki þar“

Elvar er jafnframt að undirbúa sig fyrir komandi leiki með Íslandi, í undankeppni HM í körfubolta, en liðið mætir Ítalíu í Laugardalshöll á fimmtudag og getur með sigri þar tryggt sig inn á lokastig undankeppninnar. Viðtalið við Elvar má sjá hér að neðan.

Elvar segir það aldrei hafa komið til greina að snúa heim og spila í Bónus-deildinni næsta vetur. Hann hefur komið víða við á atvinnumannaferlinum en sífellt tekið skref upp á við og lék nú síðast með Tenerife í nokkrum leikjum, í spænsku úrvalsdeildinni.

Nokkur spennandi tilboð á borðinu

„Þetta var mjög skemmtilegt og gaman að prófa þetta „level“ aðeins. Eina bestu deild Evrópu. Leikstjórnandinn þeirra meiddist svo ég gat komið og spilað tvo leiki en svo kom hann til baka svo ég var með minna hlutverk í úrslitakeppninni. En þetta var skemmtilegt á heildina litið,“ segir Elvar en hann ræddi við Vísi á landsliðsæfingu í Ásgarði í dag.

Elvar lék með pólska liðinu Anwil Wloclawek í vetur og fór svo til liðs við Tenerife eftir að tímabilinu í Póllandi lauk. Núna er hann samningslaus og getur eflaust valið úr spennandi kostum en vill sem minnst um það segja að svo stöddu.

„Það er eitthvað sem ég er að skoða og mun líklega velja úr á næstunni. Það eru nokkur spennandi tilboð sem ég er að horfa á og reyna að finna út hvað kemur sér best fyrir ferilinn og fjölskylduna.

Það hefur aldrei staðið til [að snúa heim í íslensku deildina núna]. Ég er búinn að vinna mig hægt og rólega upp stigann í ein sjö ár og sé enga ástæðu til að hætta núna þegar ég er kominn á þetta stig. Ég ætla að halda áfram og er ekkert að horfa heim strax.

Það kemur bara í ljós á næstu dögum hvað verður. Það er ekkert skothelt í þessu,“ segir Elvar.

Með annað barn á leiðinni

Hann segir mikilvægt að finna góðan kost fyrir bæði feril sinn og fjölskylduna en kona hans og sonur bjuggu á Íslandi í vetur, þar sem sonurinn byrjaði í 1. bekk í grunnskóla.

„Svo erum við að eignast annað barn á næstu vikum og planið er að við flytjum svo öll út saman. Þannig að þetta verður aðeins heilbrigðara fjölskyldulíf. Mér er eiginlega sama hvar það verður, ef maður getur verið með fjölskylduna hjá sér. Þá er allt lífið þægilegra. Við stefnum því á það að vera saman í vetur.

Maður getur verið á frábærum stað í Póllandi, eða Tenerife, en það er alltaf sami tómleiki þegar fjölskyldan er ekki þar. Það er því fyrsta forsenda, að geta verið með þau hjá mér,“ segir Elvar.

„Þetta verða tveir úrslitaleikir“

Eins og fyrr segir eru afar mikilvægir landsleikir framundan, gegn Ítalíu á fimmtudagskvöld og við Bretland í Manchester á sunnudag. Ísland þarf sigur í að minnsta kosti öðrum leikjanna til að falla ekki úr keppni, og tekur með sér alla sigra á lokastig undankeppninnar, komist liðið þangað. Liðið vann Ítalíu á útivelli og heimasigur gegn Litháen í vetur.

„Þetta eru úrslitaleikir. Við erum búnir að koma okkur í þá stöðu að eiga möguleika og vinna tvo stóra sigra, en þeir munu ekki telja neitt ef við vinnum ekki annan hvorn leikinn í þessum glugga. Við verðum að gera allt til að láta þá telja. Þetta verða tveir úrslitaleikir og spennandi að sjá hvernig við mætum tilbúnir í þá. Það kæmi okkur í mjög góða stöðu upp á að komast á HM, að vinna annan eða báða leikina,“ segir Elvar.