Ís­lendingarnir fengu mjög góð ráð frá Patrick Reed

Þetta segir Sigmundur Einar Másson sem er í þjálfarateymi Gunnlaugs Árna og er mættur á mótið. Hann ræddi við fulltrúa GSÍ fyrir síðasta æfingahringinn áður en mótið sjálft hefst á morgun, þar sem Gunnlaugur Árni fer af stað um klukkan 18:20 að íslenskum tíma. Mótið er í beinni útsendingu á Sýn Sport.

Opna bandaríska mótið er þekkt sem það erfiðasta af risamótunum fjórum þar sem völlurinn er jafnan svo krefjandi að eðlilegt getur verið að vinna mótið með því að spila á pari. Í þetta sinn er spilað á Shinnecock Hills, í Southampton í New York-fylki.

„Undirbúningurinn fyrir mót fólst í að kynnast aðeins brautunum – vita hvernig þær liggja, hvernig vindáttirnar eru og hverjar lengdirnar eru á brautunum. Þegar komið er á staðinn er verið að skoða svæðin á flötunum og í kringum þær, og hvar séu góðir staðir til að vera á,“ segir Sigmundur um undirbúninginn.

„Við áttum frábæran hring á sunnudaginn þar sem við spiluðum með Patrick Reed. Hann og kylfusveinninn hans hjálpuðu okkur helling við að skilja völlinn og hjálpa til við greiningar á svæðum og annað,“ sagði Sigmundur en Reed hefur meðal annars unnið níu mót á PGA-mótaröðinni, Masters árið 2018 og sama ár endaði hann í 4. sæti á Opna bandaríska sem er hans besti árangur á þessu móti.

Vökva flatirnar á milli umferða

Sigmundur fór aðeins yfir þær hættur sem leynast á vellinum:

„Vindurinn er stór faktor og svo eru það flatirnar. Þessar flatir gera góð golfhögg þannig að þau hitta ekki einu sinni flötina, þar sem svæðin á flötunum eru bara mjög lítil. Það verður skemmtilegast að skoða inn í helgina.

Flatirnar verða vökvaðar á milli hringja á morgun og það er eitthvað sem ég held að hafi sjaldan verið gert á US Open, að vallarstarfsmenn séu að bleyta flatir á milli umferða. Þetta verður mjög gaman að sjá og segir okkur að það er viss hræðsla við vindinn á morgun, og flatirnar hérna geta verið mjög athyglisverðar,“ sagði Sigmundur sem eins og aðrir Íslendingar bíður spenntur eftir stóru stundinni á morgun.

„Eigum að njóta þess að fylgjast með“

„Ég held að þetta verði bara frábær skemmtun. Það er stórkostlegt að við séum komin með Íslending hérna að keppa. Við eigum að njóta þess að sjá þetta og fylgjast með. Maður heyrir það á keppendum, kylfuframleiðendum og þjálfurum að það er rosaleg virðing fyrir vellinum. Það gleymir enginn hvað gerðist hér á laugardegi 2018, þegar enginn spilaði undir pari. US Open vinnst vanalega á skori sem er í kringum par, svo það að fá nokkra skolla og annað er bara partur af golfinu á US Open.“