„Ís­land ætti ekki að eiga kylfing sem spilar svona vel“

Gunn­laugur hefur undan­farin tvö ár verið að gera frábæra hluti í háskólagolfinu með liði LSU í Bandaríkjunum og er hann einn besti áhuga­kylfingur i heimi. Fram­undan er fyrsta risamótið, US Open á fimmtu­daginn kemur og hann er klár fyrir það svið.

U.S. Open risamótið verður sýnt í beinni út­sendingu á Sýn Sport.

„Fyrir okkur í þessari LSU búbblu sem og á Ís­landi vita allir hversu góður kylfingur hann er,“ segir Jake Amos, þjálfari Gunn­laugs Árna hjá LSU háskólanum í sam­tali við íþrótta­deild Sýnar „Það vita allir hvað hann hefur gert undan­farin tvö ár í háskólagolfinu, hver þróun hans hefur verið. Hann á hins vegar eftir að sýna sig á stóra sviðinu í golf­heiminum. Núna er hann með það tækifæri. Fólk mun fá að vita meira um hann, hinn al­menni golfáhugamaður um allan heim mun sjá meira af honum. Sveiflan hans er frábær. Spila­mennskan býr í honum til að vera sam­keppnis­hæfur á risamóti. Hvað hann og ferilinn varðar snýst þetta bara um sviðið til að geta sýnt sig á. Hann hefur það tækifæri núna. Getur sýnt heiminum hversu góður hann er.“

Íslendingar megi vera stoltir af Gunnlaugi

Gunn­laugur Árni sé með frábært hugar­far, hugar­far at­vinnu­kylfings.

„Gunn­laugur Árni er með frábært hugar­far. Hann er einn þroskaðasti krakki sem ég hef á ævi minni hitt. Allt það sem hann hefur gert hingað til hefur gert hann kláran fyrir þetta tækifæri. Hann er með nálgun at­vinnu­manns að því hvernig hann hagar sínu lífi. Það nær stundum á þann stað að við þurfum að minna hann á að það er skemmti­legt að spila golf. Að hann þurfi að halda áfram að skemmta sér að því að spila golf. Hann er bara svo metnaðar­fullur.

Ís­lendingar ættu að vera mjög stoltir af sínum manni. Ísland ætti ekki að eiga kylfing sem spilar svona vel. Bara ef við skoðum veður­fars­legar aðstæður og söguna. Hann er að brjóta niður múra og á mögu­leika á því að verða fyrsta flokks kylfingur. Þetta er rós í hnappa­gatið hjá þjálfurum hans á Ís­landi.“

En hversu langt getur Gunn­laugur náð í íþróttinni?

„Eins og staðan er núna er leiðin úr háskólagolfinu yfir í PGA mótaröðina greið eftir út­skrift. Hann er í þannig stöðu núna að geta náð því. Þegar að hann kemst inn á PGA mótaröðina þá mun hann vera þar yfir lengri tíma vegna þess að hann fram­kvæmir allt það sem krefst ekki hreinna hæfi­leika á mjög háu gæða­stigi. Það er stærsta hindrunin hjá mörgum hæfi­leikaríkum kylfingum. Hvort þeir geti hagað sínu lífi þannig að það sé betra en hjá öllum öðrum. Núna er Gunn­laugur Árni að gera það.“

Brot úr viðtalinu við Jake Amos, þjálfari Gunnlaugs Árna hjá LSU má sjá í spilaranum hér fyrir ofan.