Turninn á Lækjar­torgi fær nýtt líf

Eitt helsta kennileiti miðbæjarins, söluturninn á Lækjartorgi, hefur hlotið margs konar mismunandi hlutverk í gegnum tíðina. Hann hefur verið blaðsöluturn, hljómturn og þar var einnig á tímabili talsími fyrir almenning.

Nú verður þó í fyrsta sinn rekin í turninum ísbúð en nýir eigendur stefna á búðina í næstu viku, þann 10. júní. Greint var frá opnuninni á Facebook-síðu Ísfabrikunnar.

„Hugmyndin að Ísfabrikkunni er búin að vera lengi á lofti en undirbúningur hófst fyrir um þremur árum,“ segir Kristján Páll Rafnsson, sem á fyrirtækið ásamt Magdalenu Szczotka, í samtali við blaðamann Vísis og bætir því við að þau hafi sótt námskeið í svokallaðri gelató-gerð.

„Við erum búin að flakka um allan heim og skoða ísgerðir og búðir þannig að innblástur fyrir ísinn kemur víða að,“ segir Kristján og nefnir sem dæmi Argentínu, Sikiley, Bologna, New York og fleiri lönd og borgir.

Stefna á að opna á fleiri stöðum

Hann segir í samtali við blaðamann Vísis frá því að þau leggi mikla áherslu á gæða hráefni og að þau séu með framleiðsluna í Garðabæ.

„Við vorum að búa til níu kíló af jarðarberjaís í gær og í hann fóru rúm fimm kíló af jarðarberjum, ásamt mjólk, rjóma og sykurtegundum,“ segir Kristján og bætir við að þau stefni á að ísinn verði fáanlegur á nokkrum stöðum á Íslandi áður en langt um líður.

Hann hafi oft keypt sér kók og prins póló í þessum turni þegar hann var lítill og finnist spennandi að taka þátt í að veita turninum nýtt líf.

Turninn fór á flakk

Turninn sjálfur á sér aldargamla sögu en hann var upprunalega reistur sem söluturn á Lækjartorgi árið 1907. Tíu árum síðar fór hann á flakk og stóð lengst af á horni Kalkofnsvegar og Hverfisgötu.

Árið 1972 eignaðist borgin síðan turninn og tæpum fjórum áratugum síðar, árið 2010, fékk hann aftur sinn sess á Lækjartorgi.

„Ég fagna því að Turninn sé kominn á sinn gamla stað. Hann er til prýði á torginu og mun örugglega vekja upp minningar í hugum margra borgarbúa,“ sagði Jón Gnarr, þáverandi borgarstjóri, þegar ákveðið var að flytja Turninn á sinn gamla stað.